Ўрта Чирчиқда 400 нафар ўқувчи мактаб биноси олиб қўйилгани сабаб дарсга боролмаётгани хабар берилди. Зоир Мирзаев ҳолатга эътибор қаратди

Ижтимоий тармоқларда Тошкент вилоятининг Ўрта Чирчиқ туманидаги 20-мактаб президент мактабига айлантирилгани, маҳаллий аҳоли фарзандлари бошқа ҳудуддаги мактабга мажбурий тарқатилгани ҳақида хабар берилганди. Тошкент вилояти ҳокимлиги мазкур муаммога муносабат билдирди. 

“Ота-оналар эса бундан норози, яқинда 12 ёшли ўқувчи қиз билан содир бўлган мудҳиш воқеадан сўнг қўрқиб қолишган. Шу воқеа сабаб 400 нафарга яқин ўқувчи мактабга бормаяпти”, — дейилади бу ҳақдаги хабарда.

Тошкент вилояти ҳокимлиги мазкур муаммога вилоят ҳокимининг шахсан ўзи эътибор қаратганини, Зоир Мирзаев топшириғига кўра воқеа жойига борган туман ҳокими Ихтиёр Қосимов ҳамда вилоят ҳокимлиги ахборот хизмати раҳбари Беҳзод Қобулов аҳоли билан учрашиб, уларга тушунтириш берганини билдирди.

“Ўрта Чирчиқ тумани ‘Тараққиёт’ МФЙдаги 20-сонли умумтаълим мактаби туман ҳокими қарори асосида тугатилган. Бино туман ихтисослаштирилган мактабига айлантирилган. Таъкидлаш жоизки, мактаб жойлашган ҳудуддан 1 км масофада 49-мактаб жойлашган. Ўқувчилар шу мактабга кўчирилган. Бошланғич синф ўқувчилари эса ўқишини аввалги бинода давом эттиради. Қўшимча қилиб айтамизки, жорий йил туман инвестиция дастури доирасида ‘Тараққиёт’ маҳалласи учун алоҳида мактаб биноси қурилиши режалаштирилган. Вилоят ҳокими топшириғи билан туман ҳокими Ихтиёр Қосимов, вилоят ҳокимининг матбуот котиби Беҳзод Қобулов жойига чиқиб, аҳоли билан учрашди. Ота-оналарга ҳолат бўйича тушунтириш берилди”, — дейилади ҳокимлик хабарида.

Қўшимча қилинишича, юқори синф ўқувчиларининг бир километр масофадаги мактабга қатнаши учун автобус ҳам ажратилади.