Туркияда 6 февраль куни 7,4 магнитудали зилзила содир бўлди. Оқибатда бир неча шаҳарларда бинолар қулаб тушди. Ўзбекистон ҳукумати ҳолат юзасидан Туркияга гуманитар ёрдам юборади.
Президент матбуот котибининг маълум қилишича, Шавкат Мирзиёев Туркияга ёрдам юбориш бўйича топшириқ берган. Унга кўра, кучли зилзиладан жабр кўрганларга гуманитар ёрдам ҳамда табиий офат оқибатларини бартараф этишда иштирок этиш учун Фавқулодда вазиятлар вазирлигининг бир гуруҳ қутқарувчилари жўнатилади.
Аввалроқ Шавкат Мирзиёев Туркия жануби-шарқий қисмидаги вилоятларда юз берган кучли зилзила оқибатлари муносабати билан Ражаб Тоййиб Эрдўғонга ҳамдардлик йўллаганди.
Ўзбекистон ТИВ матбуот хизмати берган маълумотга кўра, 6 февраль Тошкент вақти билан соат 11:00 ҳолатига кўра, Ўзбекистоннинг Туркиядаги дипломатик ваколатхоналарига зилзила оқибатида ҳалок бўлган ва жароҳатланган Ўзбекистон фуқаролари бўйича маълумот келиб тушмаган.
Изоҳ (0)