Ҳарри Кейн АПЛда 200 та гол урган тарихдаги учинчи футболчи бўлди

“Тоттенҳэм” ҳужумчиси Ҳарри Кейн Премьер Лига 22-тури доирасида кечган “Манчестер Сити”га қарши баҳсда (1:0) гол уришга муваффақ бўлди.

Бу англиялик футболчи учун АПЛдаги 200-гол бўлди. Кейн Премьер Лигада 200 та гол урган Алан Ширер (260) ва Уэйн Рунидан (208) кейинги учинчи футболчи бўлди.

Шу билан бирга Ҳарри ушбу довонни забт этиш учун ҳаммадан кам ўйин сарфлаган — 304. Ширер АПЛда гол уриши учун 306 та ўйин керак бўлган бўлса, Руни бу натижага 462 та баҳсда эришган.

Шунингдек, 29 ёшли футболчи “Тоттенҳэм” сафида барча мусобақалар доирасидаги 267-голини урган ҳолда клуб тарихидаги энг яхши тўпурарга айланди. Бу борада Кейн Жимми Гривзнинг рекордини янгилади.