Австралиянинг ғарбий соҳилида жойлашган Перт шаҳрида 16 ёшли қиз акула ҳужумидан сўнг вафот этди, деб хабар бермоқда 9News телеканали.
ОАВ маълумотларига кўра, қиз Суон дарёси бўйлаб сув чанғисида учаётганди, сўнг делфинлар билан бирга сузиш учун сувга сакраган. Шу пайт унга акула ҳужум қилган. Воқеага гувоҳ бўлган шаҳар аҳолиси жабрланувчини сувдан олиб чиқиб, қутқарувчиларни чақирган. Бироқ оғир тан жароҳатлари туфайли қиз шифокорлар етиб келгунига қадар воқеа жойида вафот этган.
Ғарбий Австралия штат полицияси маълумотларига кўра, бу воқеа 100 йилдан ортиқ вақт ичида Суон дарёсида биринчи ҳалокатли акула ҳужуми бўлди. Бу ерда охирги марта 1923 йил январь ойида 13 ёшли бола шундай ҳужумдан вафот этганди.
Полиция фикрича, қизга йиртқич буқа-акула ҳужум қилган, у тўмтоқ акула деб ҳам аталади. У ўзига хос тажовузкорлиги билан ажралиб туради ва ўзига ёққан ўлжага яшин тезлигида ҳужум қила олади. Ушбу турдаги акулалар кенг диапозондаги сув шўрланишига чидай олади ва океаннинг қирғоққа яқин қисмида яшайди, кўпинча чучук сувларга киради, дарёлар бўйлаб узоқ масофаларга сузади.
Январь ойи охирида Австралияда саккиз ёшли бола денгизда балиқ овлаётганида акула ҳужумига учраганди. Бола омон қолган.
Изоҳ (0)