Тошкент вилояти Паркент туманида автокран қулаб тушиши оқибатида машинист вафот этганди. Бош прокуратура матбуот хизматининг “Дарё”га маълум қилишича, ҳолат юзасидан жиноят иши қўзғатилди.
Маълум қилинишича, ушбу кран бошқарувчиси — 37 ёшли С.А. танасида бош мия чайқалиши, бош мия ёпиқ жароҳати, умуртқа поғонаси кўкрак бел қисми юмшоқ тўқималари лат ейиши, кўкрак қафаси қорин тўмтоқ жароҳати, ўнг томон пневмоторакс, травматик шок каби тан жароҳатлари борлиги аниқланиб, олиб борилган тиббий ёрдам муолажаларига қарамай, тиббиёт бирлашмасида вафот этган.
Мазкур ҳолат юзасидан Паркент тумани ИИБ ҳузуридаги тергов бўлими томонидан Жиноят кодексининг 257-моддаси 2-қисми “а” банди (меҳнатни муҳофаза қилиш қоидаларини бузиш одам ўлишига сабаб бўлиши) билан жиноят иши қўзғатилиб, дастлабки тергов ҳаракатларига киришилган.
Ҳозирда жиноят иши юзасидан тергов ҳаракатлари давом эттирилмоқда.
“Ўзбекистон темир йўллари” матбуот хизмати эълон қилган ахборотда юкни бир нечта кранлар билан кўтариш асосида амалга оширилмагани бахтсиз ҳодисанинг асосий омилларидан бири сифатида кўрсатилганди.
Изоҳ (0)