Буюк Британия Ички ишлар вазирлиги “Вагнер” хусусий ҳарбий компаниясини террорчи ташкилот деб эълон қилиш режалари устида ишламоқда, деб хабар берди The Telegraph.
Нашрнинг ёзишича, Британия расмийларининг тегишли қарори “Вагнер” гуруҳини ИШИД ва “Ал-Қоида” каби гуруҳлар билан бир қаторга қўяди, бу эса, ўз навбатида, гуруҳнинг Буюк Британия молиявий институтлари орқали ўтадиган актив ёки даромад оқимига таъсир қилади.
Бундан ташқари, агар Британия ҳукумати “Вагнер”ни террорчи ташкилот деб тан олса, Буюк Британияда нафақат ушбу тузилмага аъзо бўлиш ёки унинг тадбирларида қатнашиш, балки вагнерчиларни ҳар қандай қўллаб-қувватлаш ва ҳатто логотипни оммавий намойиш қилиш ҳам жиноий жавобгарликка тортилади.
Ҳозирда, деб ёзади газета, бу масала муҳокаманинг дастлабки босқичида, бироқ, манбаларнинг айтишича, якуний қарор нисбатан тезроқ қабул қилиниши мумкин. 6 февраль куни Британия парламенти Жамоатлар палатасининг Ташқи алоқалар қўмитасида “Вагнер” фаолиятига оид муҳокама бўлиб ўтиши кутилмоқда.
Telegraph нашри журналистлари Буюк Британия расмийлари якуний қарор қабул қилинмагунча вазиятга изоҳ бермайди, деб ўйламоқда.
Январь ойи охирида АҚШ Молия вазирлиги “Вагнер”ни трансмиллий жиноий ташкилот деб эълон қилди, шунингдек, гуруҳ билан боғлиқ бўлган тузилмалар ва компанияларга қарши қўшимча санкциялар жорий қилди.
“Вагнер” жангарилари Украинадаги урушда фаол иштирок этмоқда, улар расмий равишда Россия Мудофаа вазирлигига ҳисобот бермайди. Бундан ташқари, гуруҳ Африканинг турли мамлакатларида фаолият юритади. Гуруҳ жангчилари бор жойларнинг барчасидан “Вагнер”чилар томонидан содир этилган кўплаб жиноятлар ҳақида хабарлар келади.
Изоҳ (0)