Соғлиқни сақлаш вазирининг ижтимоий тармоқларда эълон қилинган телефон рақамига кунига 500 дан ортиқ мурожаатлар келиб тушмоқда. Бу ҳақда Амрулло Иноятов Наманганда бўлиб ўтган матбуот анжумани давомида маълум қилди, дея хабар беради “Дарё” мухбири Азизбек Абдувалиев.
“Кўпчилик ушбу рақамга қўнғироқ қилганимизда ўзи эмас, ёрдамчиси ёки ҳайдовчиси оляпти деб нолибди. Тўғри тушуниш керак, кўпинча кун давомида 3-4 та мажлисда иштирок этамиз ёки ўзимиз ўтказамиз. Бу пайт, табиийки, телефон ўзимда бўлмайди. Бироқ бу телефонга юборилган мурожаатлар эътиборсиз қолади, дегани эмас. Тизим, ундаги айрим раҳбарлар ҳақида шундай маълумотлар келяптики... Ишга қабул қилишдаги таъмагирликлар, таниш-билишчилик ҳолатлари ва ҳоказо. Биринчи чорак якуни бўйича буларнинг муҳокамаси ва амалий натижалари бўлади ҳали. Ким бўлиши ва қандай хизмат кўрсатиб қўйганидан қатъий назар, кескин чоралар кўрамиз”, — деди Амрулло Иноятов.
Вазир Наманганда 2022 йил давомида соғлиқни сақлаш тизимида 22 та ҳолатда жиноят қайд этилгани, қонунбузилишларнинг энг катта қисми пора эвазига ишга жойлаштиришга тўғри келишини билдирди. Шунингдек, вилоятдаги тиббиёт ходимлари фаолиятидан норози бўлиб 50 дан ортиқ мурожаат йўлланган.
Изоҳ (0)