Самарқандда банкоматдан 720 млн сўм ўғирлаган гуруҳ қўлга олинди

Самарқанд вилояти Каттақўрғон туманида бир гуруҳ йигитлар 25 январь куни банкоматдан 720 миллион сўм пулни олиб қочди. Бу ҳақда вилоят ИИБ ахборот хизмати хабар берди.

Қайд этилишича, тезкор суриштирув ишлари давомида Каттақўрғон туман “Таварон” маҳалласидаги ташландиқ жойдан ўғирланган банкомат аппарати бўлакларга бўлинган ҳолда топилган.

Ушбу жиноятни содир этган шахсларни аниқлаш ва уларни қидириб топиш бўйича олиб борилган суриштирувлар давомида мазкур жиноятда гумонланган тўрт нафар йигит қўлга олинган.

Ҳозирда уларга нисбатан қамоққа олиш тарзидаги эҳтиёт чораси қўлланилган. Ҳолат юзасидан жиноят иши қўзғатилиб, тергов ҳаракатлари олиб борилмоқда.

Мавзуга доир:

• Тошкентда банкоматни бузмоқчи бўлган шахс қўлга тушди
• Андижонда банкоматни бузиб, ундаги пулларни ўғирлашга уринган шахс қўлга олинди