Европанинг қатор давлатлари Истанбулдаги консуллигини ёпди. Туркия тўққизта давлат элчисини ТИВга чақиртирди

Туркия Истанбулдаги қатор Европа консулликлари вақтинча ёпилганидан сўнг тўққизта давлат элчиларини ТИВга чақиртирди. Бу ҳақда Deutsche Welle хабар берди.

Маълум қилинишича, Германия, Бельгия, Буюк Британия, Франция, Италия, Нидерландия, Швейцария, Швеция ва АҚШ элчилари Туркия Ташқи ишлар вазирлигида йиғилишга чақирилган. Германия 1 февраль куни Европанинг айрим давлатларида Қуръон ёқиб юборилган воқеалардан сўнг терактлар хавфи кучайганини айтиб, Истанбулдаги консуллигини ёпган. Камида олтита давлат эҳтиёт чораси сифатида худди шундай қадам ташлаган.

АҚШ консуллиги очиқлигича қолмоқда, чунки мажмуа Истанбул марказида жойлашган. Бироқ, Вашингтон бошқа бир қатор мамлакатлар ҳукуматларига қўшилган ва фуқароларига ҳушёр бўлишни ва сайёҳлик нуқталаридан қочишни маслаҳат берувчи огоҳлантириш чиқарган.

Туркия бир гуруҳ Ғарб давлатларини танқид қилиб, уларни “психологик уруш” олиб боришда ва Туркиянинг туризм саноатини барбод қилишга уринишда айблади.

Туркия ҳукумати ҳам ўз фуқароларини Европа ва АҚШга сафар қилишнинг эҳтимолий хавфидан огоҳлантирган. Туркия Ташқи ишлар вазирлиги Европадаги фуқароларини намойишлар ўтаётган ҳудудлардан нари юришга чақирган. Мамлакат сўнгги пайтларда мусулмонлар ва туркларга қарши авж олган норозилик қитъада “диний муросасизлик ва нафратнинг хавфли даражасини” кўрсатаётганини таъкидлаган.