Тошкент вилоятида аҳолининг мол-қўйларини ўғирлаётган гуруҳ ушланди

Тошкент вилояти Юқори Чирчиқ туманида фуқароларнинг мой-қўйларини ўғирлаб келган гуруҳ аъзолари қўлга олинди. Бу ҳақда вилоят Ички ишлар бош бошқармаси ахборот хизмати хабар берди.

Қайд этилишича, “Файзобод” маҳалласида яшовчи фуқаронинг ҳовлисидан 5 бош қўйлар номаълум шахслар томонидан ўғирлаб кетилган. Мазкур ҳолат шу вақтнинг ўзида ички ишлар бўлими назоратига олиниб, суриштирув ишларига киришилган.

Орадан 4 кун ўтиб, ушбу маҳалланинг “Қайтмас” кўчасида яшовчи яна бир фуқаро хонадонидан ҳам юқоридаги каби 4 бош қўйлар ва 2 бош бузоқ ўғирлангани ҳақида тезкор хабар олинган. 

Ҳудудда ўтказилган ўрганишлар ва тезкор суриштирув тадбирлари давомида ушбу икки жиноятни 20-25 ёшлар орасидаги 6 нафар шахслар содир этганлиги аниқланиб, улар процессуал тартибда ушланган. 

Ҳолат юзасидан дастлабки тергов жараёнида биринчи ҳолат бўйича фуқарога етказилган 15 млн сўм моддий зарар ундириб берилишига эришилган бўлса, иккинчи ҳолатда ўғирланган 4 бош қўй ва 2 бош бузоқ жабрланувчига қайтарилиши таъминланган. Ҳозирда уларга нисбатан Жиноят кодексининг 169-моддаси (ўғрилик) 3-қисми билан жиноят иши қўзғатилган.