Шавкат Мирзиёев маҳаллий маҳсулотлар таннархини тушириш бўйича ёрдам бериш кераклигини айтди
3 февраль куни Шавкат Мирзиёев Наманган шаҳридаги “Баркамол авлод” кичик саноат ва тадбиркорлик зонасида бўлди. Бу ҳақда Президент матбуот хизмати хабар қилди.
Қайд этилишича, мамлакатда тадбиркорларга муносиб шароит яратиш учун жойларда технопарк ва кичик саноат зоналари ташкил этилмоқда. Наманган вилоятида бундай мажмуалар сони 73 тага етган.
“Баркамол авлод“ маҳалласи ёнидаги 10 гектарда зарур инфратузилмага эга яхлит мажмуа қурилган. Бу ерга 46 та лойиҳа жойлаштирилган. Уларнинг 18 тасида ишлар якунланиб, корхоналар фаолиятини бошланган, 2 мингдан ортиқ иш ўрни очилган.
Давлат раҳбари шу ердаги “Мастер класс дизайн”, “Сифат ёғоч саноат”, “Баланс текс” корхоналаридаги иш жараёнини кўздан кечирган.
Биринчи корхонада йилига 150 минг дона чарм-поябзал маҳсулотлари ишлаб чиқарилмоқда. “Сифат ёғоч саноат” йилига 1 минг 200 тўплам мебеллар, “Баланс текс” 400 минг дона тўқимачилик товарлари тайёрлаш қувватига эга. Уларда қўшни маҳаллалардаги аввал ишсиз бўлган ёшлар, хотин-қизлар меҳнат қилиб, даромад топмоқда.
“Ўзи одамларимиз ишбилармон, шижоатли. Мана, замин яратувдик, тадбиркорлик ъюриб кетдиъ. Энди ишлаб чиқарувчиларга таннархни тушириш бўйича ёрдам бериш керак. Таннарх - тадбиркорнинг 'ҳаёт-мамоти'. Таннарх пасайса, экспортга чиқиш енгиллашади, бизнес кенгаяди, яна ишчи олади“, — деган Шавкат Мирзиёев.
Саноат зонасидаги бошқа лойиҳаларда ускуналар ўрнатилмоқда. Бу ерда тайёр кийим-кечак, чарм-поябзал, қурилиш материаллари, мебел, қоғоз, озиқ-овқат ва кимё маҳсулотлари ишлаб чиқарилади. Шу атрофдаги “Баркамол авлод”, “Яккатут”, “Янгиҳаёт”, “Обжувоз”, “Лола”, “Чаман” маҳаллаларида яшовчи 6 мингдан зиёд аҳоли иш билан таъминланади.
Президент шу ерда Наманганда ишлаб чиқарилаётган саноат маҳсулотлари кўргазмаси билан ҳам танишган. Мавжуд тармоқларга қўшимча асаларичилик, заргарлик, мева-сабзавотчиликни ривожлантириш бўйича кўрсатмалар берилган.
