Наманганни “ишсизликдан холи ҳудуд”га айлантириш бўйича “йўл харита”си тасдиқланади
Айни вақтда президент Шавкат Мирзиёев Наманган шаҳрида бизнес вакиллари, тадбиркорлар билан мулоқот ўтказмоқда. Бу ҳақда “Дарё” мухбири хабар берди.
Президент масъулларга қатор топшириқларни берди. Жумладан, Бош вазир ўринбосари Жамшид Қўчқоров, камбағалликни қисқартириш ва бандлик вазири Беҳзод Мусаев, Наманган вилояти ҳокими Шавкат Абдураззоқовга бир ҳафтада 500 минг аҳоли бандлиги дастурини секторлар кесимида тақсимлаб, вилоятни “ишсизликдан холи ҳудуд”га айлантириш бўйича “йўл харита”сини тасдиқлаш топшириғи берилди.
Бош вазир ўринбосари Жамшид Қўчқоров ҳамда қишлоқ хўжалиги вазири Азиз Воитовга сектор раҳбарлари ва ҳоким ёрдамчилари билан бирга, 2023 йилда ажратиладиган 9,5 минг гектарда 67 мингта доимий ва 135 мингта мавсумий иш ўринлари ташкил қилиш топширилди.
Камбағалликни қисқартириш ва бандлик вазири Беҳзод Мусаев ва иқтисодиёт ва молия вазири Шерзод Қудбиевга ҳокимлар ва банклар билан ишлаб, хизматлар соҳасида 176 мингта иш ўрни яратиш топшириғи берилди.
Бош вазир ўринбосари Жамшид Ходжаев ҳамда инвестициялар, саноат ва савдо вазири Лазиз Қудратовга вилоятда 1 млрд долларлик 1 мингта лойиҳани ишга тушириб, 45 минг янги иш ўрни ташкил қилиш топширилди.
Касаба уюшмалари федерация раиси Қудратилла Рафиқов ҳамда бош вазир ўринбосари Зулайҳо Маҳкамовага бир ой муддатда “маҳаллабай” ҳисоб-китоб қилиб, аёлларни касб-ҳунарга ўқитиши, уларни иш билан таъминлаши бўйича топшириқ берилди.
“Бунда, камида 12 минг нафар аёлнинг фарзанди янги боғчаларга боришини инобатга олиш, биринчи галда уларни ишлаши учун шароит қилиб бериш зарур”, — деди давлат раҳбари.
Иқтисодиёт ва молия вазири Шерзод Қудбиев мактабгача ва мактаб таълими вазири Ҳилола Умарова билан бирга, 2023 йилда мактабгача таълимда хусусий боғчаларни ривожлантириш учун, вилоятга қўшимча 50 миллиард сўм субсидия ажратиш топширилди.
Ёшлар сиёсати ва спорт вазири Адҳам Икрамов ҳамда ёшлар сиёсати ва спорт вазирининг биринчи ўринбосари – Ёшлар ишлари агентлиги директори Алишер Саъдуллаевга 2023 йилда меҳнат бозорига кириб келадиган 20 минг Наманганлик ёшлар билан манзилли ишлаш топширилди.
Шу билан бирга:
- “Ёшлар дафтари” орқали вилоятдаги 23 минг нафар ёшларга кўмаклашиши;
- 8,5 минг нафарига кредит бериб, уларни тадбиркор қилиши;
- 25 минг нафарига деҳқончилик учун ер ажратиши;
- 16 минг нафарини бўш иш ўринларига жойлаштириши зарур.
