Грузия собиқ президенти Михаил Саакашвили жазони вақтинча тўхтатиб туриш ёки жазодан озод қилиш бўйича суд мажлисида масофадан туриб иштирок этди. Украина президенти унинг соғлиғидаги ўзгаришларни кўриб, Грузия ҳукуматини танқид қилди. Бу ҳақда “Интерфакс” хабар берди.
Саакашвили суд мажлисида соғлиғи ёмонлигини маълум қилган ва футболкасини кўтариб, ҳибсда ушлаб турилганда қанчалик озганини кўрсатган.
“Мен бутун билимимни Грузияга бердим. Энди эса соғлигимни топширдим, улардан ягона сўрайдиган нарсам — менга муносиб даволаниш имконияти беришсин. Агар керак бўлса, жонимни ҳам бераман. Соғлиғим кескин ёмонлашди”, — деди сиёсатчи судда.
Шу билан бирга, 1 февраль куни Михаил Саакашвилининг Facebook’даги саҳифасида сиёсатчининг украиналикларга мурожаати эълон қилинди, унда у “юрагини Киевга дафн этиш” истагини билдирган.
“Мени қийноққа солиб, заҳарлашмоқда. Сизга мурожаат қилмоқчиман, ҳамма Украина халқидан мамнунлигидан фахрланаман. Зеленский президент экани ва унинг позициясидан миннатдорман. Украина урушда ғалаба қозонишга мутлақо ишонаман Аммо ғалабани кўришгача яшолмасам, юрагим Киевга дафн этилиши керак — у Украинага тегишли. Украинага шон-шараф, душманимизга эса ўлим“, — деган Михаил Саакашвили.
Украина президенти Владимир Зеленский 1 февраль куни Австрия президенти Александр Ван дер Беллен билан қўшма матбуот анжуманида Саакашвили иштирокидаги видеога муносабат билдирди ва содир бўлаётган воқеаларни “Украина фуқаросининг оммавий қийноққа солиш” деб атади.
“Бу Украина фуқаросини оммавий қийнашдир. Грузиянинг собиқ президенти нима учун ҳибсга олингани, бу Грузиядаги сиёсат ва демократия учун қандай оқибатларга олиб келади? деган саволни муҳокама қилмаяпман. Бу уларнинг ички иши. Мен ҳар куни омма олдида қийноққа солинган Украина фуқароси Михаил Саакашвилининг ҳибсга олиниши ҳақида гапиряпман. Менимча, уларнинг мақсади Саакашвилини ўлдиришдир”, — деди Зеленский.
Мавзуга доир: “Қуруқ суяклари қолган”. Саакашвилининг онаси ўғлининг аҳволи ҳақида гапирди
Изоҳ (0)