Ўзбекистонда чет элликларни вақтинчалик рўйхатга олиш бўйича талаблар соддалаштирилмоқда

Ўзбекистонда чет эл фуқароларини вақтинча рўйхатга олиш учун ягона муддат ўрнатилмоқда. Бу ҳақда Norma хабар берди.

Маълум қилинишича, чет эл фуқаролари ва фуқаролиги бўлмаган шахсларни рўйхатга олиш тартиби такомиллаштирилгани муносабати билан 30 январь куни  Вазирлар Маҳкамасининг 2020 йил 28 сентябрдаги 593-сон қарори билан тасдиқланган Ўзбекистон Республикаси ҳудудида чет эл фуқаролари ва фуқаролиги бўлмаган шахсларни вақтинча турган жойи бўйича рўйхатга олиш тартиби тўғрисидаги низомга ўзгартиришлар киритиш ҳақидаги қарори қабул қилинди.

Унда айтилишича, республикага кириб келаётган чет эл фуқаролари ва фуқаролиги бўлмаган шахсларни ички ишлар органларида вақтинча турар жойи бўйича рўйхатга олиш жараёнларида айрим ноқулайликлар борлиги муаммо бўлиб қолмоқда.

Ҳужжат билан чет эл фуқароларини миграсия ва фуқароликни расмийлаштириш бўлимлари, жойлаштириш воситалари ёки даволаш муассасаларида вақтинча рўйхатга олиш учун ягона муддат ўрнатилмоқда – 3 кун ичида.

Шунингдек, мамлакатда бўлиш қоидаларини бузган, шунингдек, бошқа қоидабузарликларга йўл қўйган чет эл фуқаролари ва фуқаролиги бўлмаган шахсларни жойлаштириш воситалари ва даволаш муассасасида вақтинча рўйхатга олишни фақат ички ишлар органларидан рухсат олингандан кейин амалга ошириш тартиби бекор қилинмоқда.

Эндиликда бундай ҳуқуқбузарликларга йўл қўйган чет эл фуқаролари ва фуқаролиги бўлмаган шахсларни жойлаштириш воситалари ва даволаш муассасаларининг маъмурияти, хусусий уй-жой эгалари ҳудудий ички ишлар органларига “E-mehmon” дастури орқали хабар берган ҳолда жойлаштиради.

Ушбу ҳужжат 31 январдан кучга кирди.