“ПСЖ” ҳужумчиси Килиан Мбаппе “Реал”га ўтмаганидан афсусда.
Француз ўтган йили ёзда қилган хатти-ҳаракатидан норози бўлмоқда ва энди Мадрид клубига ўтишни интиқлик билан кутмоқда, дея ёзади Эл Чирингуито TV.
Ундан ташқари Килиан атрофидагиларга “ПСЖ” билан амадаги шартномаси 2025 йилгача эмас, 2024 йилга қадар мўлжалланганини маълум қилган.
Шунингдек, “Реал” директорлар кенгаши аъзоси ҳам Мбаппенинг “қаймоқранглилар” сафига ўтиши мумкинлигини инкор этмади.
“Флорентино Перес бор экан, ҳеч нарсани инкор этиб бўлмайди. Агар Мбаппенинг тақдирига Мадридга ўтиш ёзилган бўлса, у клуб мезонларига мос келса, бу албатта содир бўлади. Аксинча бўлса, уни бу ерда кўрмаймиз. Шунда бошқа футболчиларни излаймиз.
Флорентино клуб фойдаси учун ҳар қандай ишни амалга ошира олишига ишонаман”, — дейди Каталина Минярро.
Эслатиб ўтамиз, 2022 йил ёзида Килиан эркин агент сифатида “Реал”га ўтиши мумкин эди, бироқ сўнгги лаҳзаларда “ПСЖ” билан шартномасини узайтириб, жамоада қолишни мақъул кўрган.
24 ёшли футболчи жорий мавсум “ПСЖ” сафида 25 та ўйинда майдонга тушиб, 25 та гол ва 6 та голли узатмага муаллифлик қилди.
Изоҳ (0)