“Дарё” кундалигида 1 февралда содир бўлган энг муҳим воқеалар
“Дарё” нашри 1 февралда Ўзбекистон ва жаҳонда содир бўлган энг муҳим воқеаларни эътиборингизга ҳавола этади.
Россия элчилари ўз лавозимларидан озод қилинмоқдами?
Январь ойи охирида Россия Эстония билан дипломатик муносабатлар даражаси пасайганини эълон қилиб, мамлакат элчисидан Москвани тарк этишни талаб қилганди. Россия Ташқи ишлар вазирлиги Таллинни “русофобия ва Россияга нисбатан душманлик сиёсатида” бўлишда айблаган. Ўз ўрнида Эстония Ташқи ишлар вазирлиги бунга жавобан Россия элчисининг чиқариб юборилишини эълон қилди.
Сўнгги маълумотларга кўра, Литва Ташқи ишлар вазирлиги раҳбари Габриэлюс Ландсбергис Россия элчиларининг Европа Иттифоқи мамлакатларида қолишини бемаънилик, деб ҳисоблашини маълум қилди.
“Европанинг бирорта пойтахтида элчи, Россия элчисининг бўлиши мантиққа тўғри келмайди. Аксарият ҳолларда, бу энди дипломатик муассаса эмас, балки уруш жиноятларини яширадиган ва умуман геноцид дастурини тарғиб қилувчи пропаганда муассасаси бўлиб хизмат қилмоқда”, — дея Ландсбергиснинг сўзларидан иқтибос келтирди Delfi нашри.
Вазир жараёнга баҳо берар экан, Литва 2022 йилнинг баҳорида Бучада тинч аҳолининг ўлдирилишига жавобан Россия элчисини чиқариб юборгани, январда эса Эстония ва Латвия Россия элчиларини чиқариб юборишини эълон қилгани ҳақида эслатди.
Украина илк бор узоқ масофага учадиган ракеталарни қабул қилиб олади
АҚШ Украинага 2,2 миллиард долларлик ҳарбий ёрдам пакетини тайёрламоқда, унинг таркибидан илк бор узоқ масофали ракеталар, шунингдек, бошқа ўқ-дори ва қуроллар жой олади, деб хабар берди Reuters ўз манбаларига таяниб.
Кейинроқ агентлик аниқлик киритишича, гап150 км масофага уча оладиган GLSДБ (Ground Launchэд Смалл Диаметер Бомб) ракеталари ҳақида кетмоқда. Бу қуроллар Boeing ва Сааб Group томонидан ишлаб чиқарилган, улар М270 ва ҲИMARS каби ёппасига ўт очувчи реактив тизимлардан учирилади.
Июнь ойидан бери Қўшма Штатлар Украина кучларини 20 та ҲИMARS тизимлари ва ўқ-дорилар билан таъминлади. Эндиликда ҲИMARS учун 80 километргача масофадаги нишонларга зарба бера оладиган ва сунъий йўлдошдан бошқариладиган GMLRS ракеталари етказиб берилмоқда.
Мухолифатни куч билан бостиришда айбланган икки президент ва уларнинг ғарб санкцияларига тушган давлатлари ўртасидаги ҳамкорлик
Беларусь президенти Александр Лукашенко уч кунлик давлат ташрифи билан Зимбабвега келди. Бу Беларусь президентини Африка давлатига биринчи ташрифи, деб хабар бермоқда Euronews.
Зимбабве Ташқи ишлар вазирлиги маълум қилишича, икки давлат раҳбарлари ўртасида режалаштирилган музокаралар сиёсат, тоғ-кон ва қишлоқ хўжалиги каби соҳаларда икки давлат ўртасидаги “мавжуд ажойиб муносабатлар”ни мустаҳкамлашга қаратилган.
Мутахассислар бу икки давлатни бирлаштириб турган омил Ғарбнинг уларга нисбатан қўйган санкциялари эканини таъкидлайди. “Ғарб томони мамлакатларимизни жазоламоқчи, аммо улар бунга эриша олмайди, чунки икки давлатнинг ривожланиш стратегияси ўзимизни ўзимиз таъминлашга қаратилган”, — деди Хараре провинциясидаги ЗАНС-ПФ партияси раиси Годвилс Масимирембва.
Санкциялар билан бир қаторда икки президентни уларга нисбатан инсон ҳуқуқларини бузиш, жумладан, мухолифатни куч билан бостириш айбловлари ҳам бирлаштиради. Мутахассисларнинг фикрича, дипломатик изоляция шароитида ҳар икки давлат халқаро муносабатларини диверсификация қилишга интилмоқда.
”БелТА” агентлиги хабарига кўра, Лукашенконинг ташрифи доирасида Зимбабве ва Беларусь ўртасида инвестицияларни рағбатлантириш ва биргаликда ҳимоя қилиш, таълимга оид ҳужжатларни ўзаро тан олиш ҳақидаги меморандум, икки томонлама солиққа тортишнинг олдини олиш тўғрисида келишувлар имзоланган.
Бундан ташқари томонлар Беларусь трактори ва ғалла йиғим-терим техникасини, шунингдек, дон сақлаш комплексларини қуриш ва модернизация қилиш учун ускуналарни етказиб беришни шартномалар бўйича тасдиқлашди.
Ўзбекистонга 1 трлн 12 млрд сўмлик зарар олиб келган мансабдорлар
Ўзбекистонда 2022 йил давомида республика бўйича жами 2 965 та жиноят иши бўйича 3 116 нафар мансабдор шахслар жиноий жавобгарликка тортилди. Бу ҳақда Бош прокуратура хабар берди.
Жинояти фош қилинган мансабдор шахсларнинг 110 нафари республика, 264 нафари вилоят ва 2 742 нафари туман (шаҳар) миқёсидаги вазирлик, идора ва ташкилотларда фаолият юритган.
Жиноий жавобгарликка тортилган мансабдор шахсларнинг 2103 нафари ўзганинг мулкини ўзлаштириш ва растрата йўли билан талон-торож қилиш, 265 нафари мансаб мавқейини суиистеъмол қилиш, 243 нафари фирибгарлик, 169 нафари порахўрлик, 51 нафари мансаб сохтакорлиги, 22 нафари мансабга совуққонлик билан қараш, 14 нафари мансаб ваколати доирасидан четга чиқиш ва бошқа жиноятларни содир этган.
Мансабдор шахсларнинг жиноятлари оқибатида давлат ва жамият манфаатларига 1 триллион 12 миллиард сўм миқдорида моддий зарар етказилган бўлиб, тергов жараёнида ушбу зарарнинг 847 миллиард сўми ундирилган.
