Австралияда йўқолган митти радиоактив капсула икки ҳафталик қидирувдан сўнг ниҳоят топилди
Ғарбий Австралияда Рио Тинто кон компанияси ходимлари январь ойи ўрталарида катта йўлда тушириб қолдирган цезий-137 ли радиоактив капсула ниҳоят топилди. Бу ҳақда ABC News хабар бермоқда.
6 га 8 миллиметр ўлчамдаги капсулани 1400 километрлик йўлдан қидиришаётганди — у Ньюман шаҳри яқинида, йўл четидан икки метр нарида топилди. Ғарбий Австралия фавқулодда хизматлар вазири Стивен Досон қидирув натижаларини “ғайриоддий” деб атади ва қидирув гуруҳлари “сомон уюмидан игна топгани”ни таъкидлади.
An image of the capsule is below - pic.twitter.com/pbbtfZWEN9
— Chief Health Officer, Western Australia (@CHO_WAHealth) January 27, 2023
Ўз навбатида, Рио Тинто раҳбари Саймон Тротт қидирувда иштирок этган барчага миннатдорлик билдирди. У қидирув операциясига кетган давлат харажатларини қоплаб беришни ваъда қилиб, капсулани йўқотгани учун узр сўради. Шу билан бирга, Тротт зарарни қоплаш бўйича қарорни давлат органлари қабул қилиши кераклигини қўшимча қилди.
Таркибида цезий-137 бўлган радиоактив капсула январь ойининг ўрталарида йўқолган, аммо бу ҳақда ой охирига келибгина маълум бўлганди. Қидирув бир неча кун давом этди, дастлаб Австралия расмийлари митти капсула катта йўлдан ўтиб кетаётган бирорта машина шинасига тиқилиб қолган бўлиши мумкинлигидан қўрқди. Бироқ бундай бўлмаган ва мутахассисларнинг фикрича, капсула юк машинасидан тушиб қолган жойидан силжимаган.
Ўз-ўзидан капсула фуқаролар учун жиддий хавф туғдирди. Хусусан, цезий-137 нинг терига тегиши куйиш ва нурланиш касаллиги хавфини келтириб чиқаради, капсуладан тарқаладиган нурланиш эса соатига 10 рентгенга тенг, бу узоқ вақт давомида таъсир қилса, саратонга олиб келиши мумкин.
