Олий Мажлис Қонунчилик палатасининг 31 январдаги мажлисида “Йўл ҳаракати тўғрисида”ги қонун лойиҳаси депутатлар томонидан қабул қилинди.
Қуйи палата матбуот хизматининг хабар қилишича, ушбу қонун лойиҳасида бир қатор янгиликлар кўзда тутилган. Мажлисда ҳужжатдаги асосий тушунчалар замон талаблари, ҳуқуқни қўллаш амалиётидан келиб чиқиб қайта кўриб чиқилди ва таҳрир қилинди.
Йўл ҳаракати соҳасидаги асосий принциплар соҳа амалиётидан келиб чиқиб белгиланди. Қонунийлик, тизимлилик, илмийлик, фуқаролар ҳаёти ва соғлиғи муҳофаза қилинишининг устуворлиги, экологик хавфсизликнинг ва атроф-муҳит муҳофаза қилинишининг устуворлиги, маҳаллий аҳолининг ва йўл ҳаракати қатнашчиларининг фикрини ҳисобга олиш принциплари шулар жумласидан.
Халқ демократик партияси фракциясининг 30 январда ўтказилган йиғилишида қайд этилишича, қонун лойиҳасида йўл ҳаракати хавфсизлигини таъминлаш соҳасидаги махсус ваколатли давлат органлар ҳам қайта кўриб чиқилган бўлиб, Ички ишлар вазирлиги давлат йўл ҳаракати хавфсизлигининг ваколатлари кенгайтирилмоқда.
Депутатларнинг айтишича, ушбу қонун лойиҳаси ҳуқуқни қўллаш амалиётида пайдо бўлаётган тушунмовчиликларни бартараф этиш баробарида, йўл эгаларининг, йўл ҳаракати қатнашчиларининг ҳуқуқлари ва мажбуриятларини қонун билан мустаҳкамлашга хизмат қилади.
Мажлисда қонун лойиҳаси депутатлар томонидан қабул қилинди.
Изоҳ (0)