“Халқаро ҳуқуқни бузиш“: Human Rights Watch ташкилоти Украинани тақиқланган миналардан фойдаланганликда айблади (фото)
Инсон ҳуқуқларини ҳимоя қилувчи Human Rights Watch ташкилоти Украина армияси тақиқланган “япроқли миналардан” фойдаланаётганини даъво қилди. Бу ҳақда ташкилот сайтида хабар берилди.
Маълум қилинишича, бундай фактлар Изюм вилоятида кузатилган. Изюм шарқида ва унинг атрофида пиёдаларга қарши миналар топилган. Шаҳар Харков вилоятида жойлашган. Ҳуқуқ фаоллари Украина Қуролли кучлари томонидан “япроқли миналар” қўлланганини ҳужжатлаштирган. Украина 1997 йилдаги миналарни тақиқлаш шартномасининг аъзоси бўлгани сабабли пиёдаларга қарши ҳар қандай миналардан фойдаланиш тақиқланган.
“Украина кучлари Изюм ҳудудида кенг тарқалган миналарни тарқатиб юборган кўринади, бу тинч аҳолининг қурбон бўлишига олиб келади ва давомий хавф туғдиради”, — деди Human Rights Watchъ’нинг қурол бўйича директори Стив Гуз.
Шу билан бирга, у Россия армияси бир неча бор “япроқли миналар”дан фойдалангани, бироқ бу уларнинг Украина томонидан қўлланишини оқламаслигини қайд этди.
Бундай миналар самолётлардан, ракеталардан ва артиллериядан ёки махсус ишга тушириш мосламаларидан ташланади. Улардан фойдаланиш халқаро гуманитар ҳуқуқни ҳам бузади. PFM “япроқли миналар” тинч аҳоли ва жангчиларни ажрата олмайди.
Изюм атрофидаги 9 та туманнинг барчасида “япроқли миналар” бор, ҳуқуқ ҳимоячиларининг таъкидлашича, улар Россия қўшинлари босиб олинган ҳудудларда бўлганида жойлаштирилган.
Мудофаа вазирлиги ҳуқуқ ҳимоячиларининг Украина ўз халқаро мажбуриятларини бажариши, жумладан, пиёдаларга қарши ҳар қандай миналардан фойдаланишни тақиқлаш ҳақидаги сўровига жавоб берди. Бироқ уруш тугагунига қадар қўлланган қурол турлари ҳақидаги маълумотларга "изоҳ берилмаслиги” таъкидланди.
“Пиёдаларга қарши миналардан ҳар қандай усулда фойдаланиш ноқонуний ҳисобланади ва Украина нима бўлганини чуқур ўрганиб чиқиши ва ўз кучлари улардан фойдаланмаслигига ишонч ҳосил қилиши керак”, — деди Стив Гуз.
Sky News маълумотига кўра, Украина дунёдаги энг кўп миналанган давлатга айланди. Ҳарбий ҳаракатлар сабабли Украина ҳудудининг 40 фоиздан ортиғи миналангани маълум қилинди.
