Озарбайжон Ташқи ишлар вазирлиги фуқароларига заруратсиз Эронга бормасликни тавсия қилди.
“Эрондаги беқарор вазият ва Озарбайжон дипломатик ваколатхонасига қарши уюштирилган терактни ҳисобга олиб, биз фуқароларга Эронга заруратсиз ташриф буюрмасликни, Ислом Республикасида бўлиб турганларга эса ўта эҳтиёткорлик ва хавфсизлик қоидаларига риоя қилишни тавсия этамиз”, — дейилади Озарбайжон ташқи ишлар вазирлиги баёнотида.
27 январь куни Теҳрондаги Озарбайжон элчихонасига ҳужум уюштирилган эди. Ҳужумчи хавфсизлик постида Калашников автоматидан ўқ узган, қўриқчилар бошлиғи ҳалок бўлган. Яна икки қўриқчи яраланган. Кейинроқ ҳужум лаҳзалари акс этган видео эълон қилинди.
ОАВ элчихонада отишма содир этган эркак буни оилавий сабабларга кўра қилгани ҳақида ёзди. У ярим йилдан ортиқ вақтдан бери бедарак кетган рафиқасини шу дипломатик ваколатхона биносида деб ўйлаган.
Изоҳ (0)