Ҳиндистонлик миллиардер дунёдаги энг бой одамлар ўнлигидан чиқиб кетди

Ҳиндистонлик миллиардер Гаутам Адани ўзининг Adani Group конгломерати қийматининг кескин пасайиши туфайли дунёнинг энг бадавлат одамлари рейтингида 4-ўриндан 11-ўринга тушиб кетди. Бу ҳақда Bloomberg хабар берди.

Агентлик маълумотларига кўра, сўнгги уч кунлик савдолар давомида тадбиркор 34 миллиард доллар йўқотган, ҳозирда унинг бойлиги 84,4 миллиард долларга баҳоланмоқда.

Bloomberg’нинг қайд этишича, Адани ҳамон Осиёдаги энг бой одам.

Бироқ Adani Group қийматининг пасайиши давом этса, уни бошқа ҳиндистонлик миллиардер, рақиб Reliance Industries раҳбари Мукеш Амбани ортда қолдириши мумкин.

Adani Group Ҳиндистондаги энг йирик бизнес гуруҳлардан бири бўлиб, мамлакатдаги сиёсий ва иқтисодий ҳаётга таъсир кўрсатади.

Конгломерат Жанубий Осиё мамлакатининг энергетика, қишлоқ хўжалиги ва мудофаа саноатида етакчи ўринни эгаллайди.

24 январь куни Американинг Hindenburg Research тадқиқот ва савдо компанияси Аданини “ўнлаб йиллар давомида қимматли қоғозлар ва бухгалтерия ҳисобидаги фирибгарлик”да айблади. Натижада Adani Group ўтган ҳафтада 71 миллиард доллар йўқотди.