АҚШ Украинага F-16 қирувчи самолётларини етказиб бермайди, деди президент Жо Байден журналистларга. Унинг сўзларини AFP нашри Twitter’да келтирди.
“Йўқ”, деди Байден журналистнинг АҚШ Украинага F-16 самолётларини юборадими, деган саволига жавобан.
Кейинроқ Оқ уй вакили Жон Кирби Байденнинг сўзларига изоҳ берар экан, АҚШ шусиз ҳам Украина армияси учун жуда муҳим бўлган катта миқдордаги қуролларни етказиб бераётганини таъкидлади.
“Сизга шуни айта оламанки, ҳозир катта ҳажмдаги қуроллар етказиб берилмоқда, келгуси ҳафталар ва ойларда ҳам етказиб берилади. Биз билган қуроллар Украина қўшинларига қишдаги жангларда ёрдам бериш учун жуда муҳим аҳамиятли бўлади”, — деди Кирби.
Январь ойи охирида Politico ўз манбаларига таяниб, АҚШ Мудофаа вазирлигидаги бир гуруҳ ҳарбий амалдорлар Пентагонни F-16 қирувчи самолётларини Украинага жўнатишни маъқуллашга ундаётгани ҳақида ёзганди.
АҚШнинг Россиядаги собиқ элчиси Майкл Макфолнинг айтишича, Украина президенти Владимир Зеленский F-16 қирувчи самолётлари етказиб берилиши эвазига Россиядаги нишонларга зарба беришда улардан фойдаланмаслик мажбуриятини имзолаши мумкин.
Изоҳ (0)