ДХХнинг Самарқанд вилояти бошқармаси бошлиғи Абдуғаффор Аҳмедов вилоятнинг Пахтачи ҳамда Нарпай туманларида бўлиб, ёшлар билан мулоқот қилди ҳамда ёшларни қийнаб келаётган муаммоларга биргаликда ечим излади. Бу ҳақда туман ҳокимликларининг ахборот хизматлари хабар тарқатди.
Маълум бўлишича, ДХХ вилоят бошқармаси бошлиғи ва ёшлар учрашуви бугун ташкил этилган.
Учрашувда ёшларнинг мурожаат ва таклифлари тингланиб, жойида ечим топилмоқда. Жумладан, “Худойберди” маҳалласида истиқомат қилувчи Адҳам Шодмонов ўзи истиқомат қилиб келаётган маҳаллада фаолиятини йўлга қўйган автомобилларни таъмирлаш устахонасини ривожлантириш учун кўмак сўради. Шундан сўнг ҳудуд масъуллари ёрдамида ҳолатга аниқлик киритилди ва устахона аҳволини яхшилаш, Адҳам Шодмоновга керакли асбоб-ускуналар етказиб бериладиган бўлди, — дейилади Пахтачи тумани ҳокимлиги ахборот хизматининг расмий каналида.
Шунингдек, раҳбар ва ёшлар учрашувида “Дўнг” маҳалласида яшовчи Шоҳрух Бобомуродов маҳалладаги стадионнинг ўриндиқлари йўқлигини айтган бўлса, спорт мураббийси Маржона Қиличева туман марказидан спорт зал қуриб берилишида амалий ёрдам берилишини сўраган.
Давлат хавфсизлик хизматининг вилоят бошқармаси бошлиғи ёшлар муаммоларини ўрганиб, ёрдам сўралган ёшларнинг масалаларини ҳал этиш юзасидан масъулларга топшириқ берган.
Бошқарма бошлиғи шу куни Нарпай туманида яшовчи ёшлар билан ҳам мулоқот қилган. Учрашувда сўз олган Муҳриддин исмли 23 ёшли йигит тадбиркорлик билан шуғулланишини, 20 нафардан ортиқ ёшларни ишли қилганини, аномал совуқ пайтида 50 миллион сўм миқдорида зарар кўрганини, шунга қарамасдан фаолиятини давом эттириб келаётганини билдирган. Тадбиркор кўрган зарари сабаб токни кучайтириб берувчи аппаратга муҳтожлигини, уни сотиб ололмаётганини айтиб, кўмак сўраган.
Мазкур мурожаатга жавоб берган бошқарма бошлиғи мурожаатчига ёрдам берилишини, айни кунда ёшларга яратилаётган имкониятдан унумли фойдаланиш лозимлигини билдирган.
Изоҳ (0)