Ўзбекистон аҳолиси топган даромадининг 40-50 фоизини озиқ-овқат маҳсулотлари сотиб олиш учун сарфламоқда. Бу ҳақда Бош вазир ўринбосари Жамшид Қўчқоров бугун (31 январь) бўлиб ўтаётган Олий Мажлис қонунчилик палатаси мажлисида маълум қилди.
Жамшид Қўчқоровнинг таъкидлашича, 2022 йилда мамлакатда озиқ-овқат ишлаб чиқариш ҳажми 20 фоизга ўсган.
“Бугунги кунда Ўзбекистонда аҳоли даромадининг 40-50 фоизини озиқ-овқат маҳсулотлари сотиб олиш учун сарфламоқда. Шуни инобатга олиб, ҳукумат аҳолини озиқ-овқат маҳсулотлари билан узлуксиз таъминлаш борасида чора-тадбирлар кўрмоқда. Жумладан, 2022 йилда Озиқ-овқат саноатини ривожлантириш дастури доирасида республикада 41 триллион сўмлик маҳсулот ишлаб чиқарилиб, 2021 йилга нисбатан 20 фоизга ўсишга эришилди”, – деди ҳукумат расмийси.
Жамшид Қўчқоровнинг қўшимча қилишича, ўтган йили тадбиркорликни ривожлантиришга алоҳида эътибор берилган.
“Тадбиркорликни қўллаб-қувватлаш давлат жамғармаси томонидан тадбиркорлик субъектларининг 5 000 тадан ортиқ лойиҳаларига 1,7 триллион сўмдан ортиқ молиявий ёрдам кўрсатилди. Оилавий тадбиркорликни ривожлантириш дастурлари доирасида аҳолига қарийб 10 триллион сўм миқдорида имтиёзли кредитлар ажратилди. Натижада ўтган йили 122 000 та тадбиркорлик субъектлари ташкил этилди. 5 000 тага яқин корхоналар фаолияти кенгайтирилди”, – деди бош вазир ўринбосари.
Мажлисда айтилишича, 2022 йилда давлат бюджетининг жами харажатлари 236,6 триллион сўмни ташкил этган. Шундан ижтимоий соҳага 178 триллион сўм йўналтирилган ва бу харажатлар миқдори 2021 йилга нисбатан 26 фоизга ошган. Геологик лойиҳалар амалга оширилиши натижасида олтин захираси 15 тоннага, кумуш 21 тоннага, мис 20 000 тоннага, волфрам 1,5 минг тоннага, оҳактош 1,4 миллион тоннага ортган.
Изоҳ (0)