Ўзбекистонда 2022 йилда тадбиркорлик, саноат, қишлоқ хўжалиги ва хизмат кўрсатиш соҳаларида 2,7 миллион аҳолининг доимий даромадли иш билан бандлиги таъминланди. Бу ҳақда бош вазир ўринбосари Жамшид Қўчқоров 31 январь куни ўтказилган Олий Мажлис қонунчилик палатаси мажлисида маълум қилди.
Жамшид Қўчқоровнинг айтишича, ўтган йили аҳолини ижтимоий ҳимоя қилиш қамрови 1,5 баравар ортган.
“2022 йилда тадбиркорлик, саноат, қишлоқ хўжалиги ва хизмат кўрсатиш соҳаларида 2,7 миллион аҳолининг доимий даромадли иш билан бандлиги таъминланди. Қарийб 4 миллиондан зиёд аҳоли мавсумий меҳнат орқали даромад манбаига эга бўлди. Аҳолининг ижтимоий ҳимояга муҳтож қатламларига давлат бюджетидан жами 2,2 триллион сўмлик бир марталик моддий ёрдам кўрсатилди. Мамлакатдаги 2,2 миллион нафар кам таъминланган оилалар учун болалар нафақалари тайинланди. 78 мингдан ортиқ оилага моддий ёрдам кўрсатилди. Бунинг ҳисобига “Ижтимоий ҳимоя ягона реестри” ахборот тизими орқали оилаларга моддий ёрдам кўрсатиш қамрови 2021 йилга нисбатан 1,5 баравар ошди”, – деди ҳукумат расмийси.
Жамшид Қўчқоровнинг қўшимча қилишича, Жаҳон банки экспертлари билан олиб борилган кузатувларда Ўзбекистондаги камбағаллик даражаси 17 фоиздан 14 фоизгача тушгани аниқланган.
Аввалроқ бош вазир ўринбосари Ўзбекистон аҳолиси топган даромадининг 40-50 фоизини озиқ-овқат маҳсулотлари харид қилишга сарфлашини айтганди.
Изоҳ (0)