Тожикистон янги ҳосилга қадар пиёз, картошка ва сабзи экспортини тақиқлади

Тожикистон янги ҳосил олинмагунча пиёз, картошка ва сабзи экспорт қилишни тақиқлади. Бу ҳақда мамлакат қишлоқ хўжалиги вазири Қурбон Ҳакимзодага таяниб, “ТАСС” хабар берди.

“Ҳукуматнинг сўнгги йиғилишида бозордаги вазият барқарорлашгунга қадар ушбу маҳсулотларни экспорт қилишни вақтинча тақиқлаш бўйича топшириқ берилди”, — деди Қишлоқ хўжалиги вазирлиги раҳбари.

У бу чорани ушбу маҳсулотлар нархининг кўтарилиши билан изоҳлади. Шунингдек, бугунги кунда Тожикистонда бу сабзавотларнинг етарли захираси борлигини ва улардан тўғри фойдаланилса, кейинги ҳосилга қадар давом этишини таъкидлади. Одатда бу март ойининг охирида ёки апрель ойининг бошида бошланади.

Ўтган йили мамлакат хорижий давлатларга 190 минг тоннадан ортиқ қишлоқ хўжалиги маҳсулотлари сотди, бу ўтган йилга нисбатан 17,6 минг тоннага камдир.

Вазирлик маълумотларига кўра, қишлоқ хўжалиги экспортининг 40 фоиздан ортиғи сабзавот, 30 фоизга яқини мева маҳсулотларига тўғри келган.