“Права”ни янгисига алмаштириб берадиган онлайн хизмат фаолиятида носозлик кузатилмоқда

Ўзбекистонда 30 январдан бошлаб Ягона интерактив давлат хизматлари портали орқали эски намунадаги ҳайдовчилик гувоҳномасини онлайн алмаштириш имконияти яратилгани ҳақида хабар берилганди. Ўқувчилар “Дарё”га мурожаат қилиб, ушбу хизматни кўрсатишда камчиликлар юзага келаётганини маълум қилди.

Мурожаатларда айтилишича, “права”ни янгисига алмаштириш учун ариза бериш жараёнининг учинчи босқичи, яъни фуқаронинг эски ҳайдовчилик гувоҳномаси маълумотлари акс этувчи ойна очилмаяпти.

Ихтиёрий “Дарё” ходимларида ушбу хизмат тури текширилганда бир нафарининг саҳифасида ростдан ҳам маълумотлар юклангани йўқ. 

“Дарё” мухбири ҳолат юзасидан муносабат олиш мақсадида Адлия вазирлиги матбуот хизмати раҳбари билан боғланди. Севара Ўринбоева бундай вазиятда Ички ишлар вазирлигига мурожаат қилиш кераклигини, чунки база уларда эканини айтди.

Сўнг ИИВ Йўл ҳаракати хавфсизлиги хизмати матбуот хизмати бошлиғи Азиз Муродов билан боғландик. У эса Адлия вазирлигига мурожаат қилиш кераклигини айтди.

“Эълонни Давлат хизматлари маркази берган. Мен маълумотларни қаердан олишларига қизиққанимда паспорт базасидан олишаётганини билдим”, — деди Азиз Муродов.

ЙҲХХ ахборот хизмати бошлиғи ҳолатни аниқлаштириб, сўнг алоқага чиқишини билдирди, аммо ҳеч қандай тушунтириш берилмади.

Аслида ЯИДXПдаги бир хизмат турининг меъёр даражасида ишламаётгани, фаолиятида носозликлар кузатилаётганига ким жавобгар?