Бухорода 20 сотих ерни 100 минг долларга расмийлаштириб бермоқчи бўлган шахс ушланди

Бухорода ер майдонлари савдоси билан боғлиқ фирибгарлик ҳолатлари фош этилди.

Фуқаро А.Б. Вобкент тумани, “Панoб” МФЙдаги “И.Н.” фермер хўжалигига қарашли 20 сотих ер майдонини гўёки юқори лавозимда ишловчи танишлари ёрдамида 100 минг доллар эвазига фуқаро С.О.га расмийлаштириб беришини айтган.

У олдиндан 20 минг долларни олган вақтида Бош прокуратура ҳузуридаги департаментнинг Бухоро туман бўлими томонидан ИИБ ходимлари билан ҳамкорликда ўтказилган тезкор тадбирда ашёвий далиллар билан ушланган.

Шу каби, департаментнинг Когон шаҳар бўлими томонидан ИИБ ходимлари билан ҳамкорликда ўтказилган тезкор тадбирда, фуқаро Б.Ҳ. “Сармижон” массивидаги 12 гектар захирадаги ер майдонини фуқаро Ҳ.Ў.га 40 минг долларга сотишга келишиб, кейинчалик ҳужжатларни аукцион орқали расмийлаштириб беришини айтиб, олдиндан 4 минг долларни олган вақтида ашёвий далиллар билан ушланган.

Мазкур ҳолатлар юзасидан Жиноят кодексининг 168-моддаси (фирибгарлик) ва 28, 211-моддаси (пора бериш) билан жиноят ишлари қўзғатилиб, тергов ҳаракатлари ўтказилмоқда.