Озарбайжон президенти ислом давлатларини БМТ Хавфсизлик кенгашига киритишни таклиф қилди

Озарбайжон президенти Илҳом Алиев Бирлашган Миллатлар Ташкилотини ислоҳ қилиш, хусусан, Хавфсизлик Кенгаши таркибини кенгайтириш зарур, деб ҳисобламоқда. Унинг фикрича, кенгаш таркибидан ислом давлатлари ва Ҳарбий блокларга қўшилмаган ҳаракат мамлакатлари учун доимий ўринлар ажратилиши керак.

Алиев 29 январь куни Миср президенти Абдул-Фаттоҳ ас-Сиси билан Бокуда бўлиб ўтган музокаралар якунлари бўйича қўшма баёнот бериб, БМТ ислоҳоти мавзусига тўхталди.

“Ислом ҳамкорлик ташкилоти аъзоларига битта доимий ўрин берилиши керак ва ташкилот маслаҳатлашувлар асосида бу ўринга ўз номзодини кўрсатиши лозим. БМТ Хавфсизлик кенгашига яна бир доимий аъзолик Ҳарбий блокларга қўшилмайдиган ҳаракат мамлакатларидан бирига, ушбу ҳаракатга раислик қилаётган давлатга берилиши керак. Менимча, шунда адолатли бўларди”, — деди Алиев.

Озарбайжон президентининг қўшимча қилишича, бу ислоҳотлар дунёни янада хавфсиз ва адолатли қилиб шакллантиради.