10-синф учун Ўзбек тили дарслигида мусиқа асбоблари номи хато ёзилгани ҳақида хабарлар тарқалди. Республика таълим маркази дарслик юзасидан тарқалаётган эътирозларга муносабат билдирди.
Қайд этилишича, мусиқа анжомларининг номлари расмларига мувофиқ эмаслиги тасвирга олиб тарқатилган дарслик марказ томонидан 2022/2023-ўқув йили учун тайёрланган ва давлат тили иккинчи тил сифатида ўқитиладиган синфларга мўлжалланган 10-синф Ўзбек тили дарслиги ҳисобланади.
Дарсликнинг 99-бетидаги “Ўйланг ва топинг” деган топшириқ остида келтирилган 5-машқ шартига кўра, мусиқа асбобларининг номлари атайин чалкаштириб берилган ва ўқувчидан тасвирга қараб мусиқий асбобларининг номини тўғри топишни талаб этади.
Яъни машқ аралаш берилган номларни тасвир асосида тўғри номлашни назарда тутади. Машқ ҳақида ўқитувчилар учун методик қўлланмада ҳам алоҳида тушунтириш берилган. Расмда дарсликнинг эътирозга сабаб бўлган саҳифаси ва методик қўлланмада машқ юзасидан берилган кўрсатма келтирилган.
Изоҳ (0)