“Чегара масаласининг якуний ҳал этилиши Марказий Осиё минтақасида барқарорлик ва хавфсизликни мустаҳкамлашга хизмат қилади” — Садир Жапаров

Ўзбек-қирғиз чегара масаласининг якуний ҳал этилиши Марказий Осиё минтақасида барқарорлик ва хавфсизликни мустаҳкамлашга хизмат қилади. Бу ҳақда Қирғизистон президенти Садир Жапаров ОАВ вакиллари учун баёнотида айтиб ўтди.

“Бугун биз учун тарихий кун. Қирғизистон ва Ўзбекистон давлат чегарасини делимитация қилиш жараёнини якунлади, ратификация ёрлиқларини алмашди, қирғиз-ўзбек давлат чегараси бўйича шартнома тузди ва шу билан чегара масалаларига чек қўйди.

Ишончим комилки, чегара масаласининг якуний ҳал этилиши қардошлик муносабатларини янада ривожлантириш, чегарадош алоқаларни мустаҳкамлашда муҳим ўрин тутади, шунингдек, Марказий Осиё минтақасида барқарорлик ва хавфсизликни мустаҳкамлашга хизмат қилади”, — деди у.

Садир Жапаров Ўзбекистон—Қирғизистон муносабатларини мустаҳкамлаш ва кенгайтириш мамлакат ташқи сиёсатининг устувор йўналишларидан бири эканлигини таъкидлаб, икки давлат ўртасида сиёсий, иқтисодий, сармоявий, маданий-гуманитар соҳалардаги кенг кўламли масалаларни атрофлича муҳокама қилдик. Икки томонлама муносабатларимизни мустаҳкамлаш ва янада ривожлантиришга қаратилган қатор келишувларга эришилганини қайд этди.

“Жорий йилда мамлакатларимиз ўртасида дипломатик муносабатлар ўрнатилганига 30 йил тўлди. Биз ушбу муҳим юбилейни қардош давлатларга муносиб тарзда кенг миқёсда нишонлашга келишиб олдик”, — деди Қирғизистон президенти.