“Боланг туғилгач икковингга бензин қуйиб, ёқиб юбораман, деб таҳдид қилган” — Фарғонада эрининг Matiz’ида ўзини ёқиб юборгани айтилган марҳуманинг яқинлари

Ижтимоий тармоқларда 2023 йилнинг 24 январь куни Фарғонада эркак ҳомиладор аёлини машинага солиб, ёқиб юборгани ҳақида хабарлар тарқалди. Фавқулодда вазиятлар бошқармаси ҳолат юзасидан маълумот бериб, Марғилон кўчасида тўхтаб турган оқ рангли Matiz автомашинасининг салони ва мотор қисми тўлиқ ёнганини билдирди. Бош прокуратура матбуот хизмати эса машинани унда бўлган аёл ёқиб юборганини қўшимча қилди.

“Дарё” мухбири билан суҳбатлашган марҳуманинг яқинлари аёл ўзини ёқиб юборганига ишонмасликларини, қолаверса, ҳолатга гувоҳ бўлганлар воқеадан аввал Matiz ҳайдовчисининг қўлида бензинни кўрганини айтишганини таъкидламоқда.

Кечаги ҳодисадан бир кун олдин опам менга телефон қилиб, турмуш ўртоғи ўзгариб қолганини айтганди. “Ҳа уни қўй, ўзинг эсон-омон болангни бағрингга ол”, дегандим. “Боланг туғилгандан кейин икковингнинг устингдан бензин қуйиб, ёқиб юбораман, деб таҳдид қиляпти”, деганди. Ўша куни опамнинг уйқуси келмади. Соат иккигача гаплашдик. “Унақа одам бўлса, умуман гаплашма, юрма, яшама”, дедим. Бу опамнинг иккинчи турмуши эди. 10 яшар қизчаси бор. Ўша пайтда қизини уйига ташлаб чиққан бўлган. Ўзини ёқиб юборадиган ҳолатда эмасди. У боласини ўйларди, унақа тушкунликка тушмасди. Кеча ҳам тушдан кейин соат уч яримларда келди. Шу охирги марта кўрганим. Опам ўзини ёқиб юборадиган даражада эмасди. Жуда босиқ эди, — дейди марҳуманинг синглиси.

Масъулларнинг қўшимча қилишича, 24 январь куни соат тахминан 19:00 ларда фуқаро М.У. Matiz бошқарувида ҳомиладор турмуш ўртоғи (шаръий никоҳ асосида) 1987 йилда туғилган М.Х.ни шифохонадан яшаш хонадонига олиб кетаётган вақтида, турмуш ўртоғи уни рашк қилиб, жанжаллашиб қолган. Эр хотини билан гаплашиб олиш мақсадида автомашинани Фарғона шаҳридаги “Нефтьчи” стадиони рўпарасида тўхтатган. Шу вақтда автомашина орқа ўриндиғида ўтирган аёл ўзи билан уйидан олиб чиққан пластмасса идишдаги бензин ёқилғисини дастлаб турмуш ўртоғига, кейинчалик эса ўзига ҳамда автомашина салони ичига сепиб, ёқмоқчи бўлган. Турмуш ўртоғининг ушбу ҳаракатидан қўрқиб кетган эркак автомашинадан тушиб, ташқарига чиқиб қочган вақтда аёл ёндиргич (зажигалка) билан ўзини ва автомашинани ёқиб юборган. Чақирувга асосан ҳодиса жойига етиб келган Фарғона вилояти Фавқулодда вазиятлар бошқармаси ходимлари томонидан ёнғин тезкорлик билан ўчирилган.

Марҳуманинг синглиси опаси ёнган жойга бориб, ҳолатни суриштирганида ҳудуддаги салон ходими билан гаплашганини, салон ишчиси воқеа содир бўлишидан аввал Matiz ҳайдовчисининг қўлида бензин борлигини кўрганини айтганини билдирди.

Кеча ёнган жойга ҳам бордик. Ўша ерда салонда ишловчи опа “боланинг қўлида баклажкада бензин бор эди”, деди. Мен бензин опамнинг қўлидамиди ёки у боланинг қўлидамиди, деб сўрадим. “Боланинг қўлида эди”, деди. Салончи опанинг айтишича, аввал машина ташқарисида можаро бўлган. Кейин машинага ўтиришган. Сўнгра у бола машинадан тушиб қочган. Уни қувлаганлар ҳам бор экан-да. Энди у бола ёлғон кўрсатма бериб, мен эшикни очолмай қолдим дебди. Бу гап ёлғон-да. Опам машинада ўтирган ҳолида қолиб кетган. У опамга бирор нима берган, шекилли. Агар шундай бўлмаганда, у машинадан тушиб қоларди-ю. Опамнинг кучи кўп эди. Қолаверса, опам ўзини ёқворадиган қиз эмасди, — дейди марҳуманинг синглиси.

Марҳуманинг онаси куёви қизига шаръий никоҳ асосида уйланиб, Фарғона шаҳридаги кўп қаватли уйлардан ижарага хонадон олиб берганини маълум қилди.

Қизимнинг биринчи турмуши бўлмаган. 10 ёшли қизчаси бор. Шароитимиз йўқлиги учун 2022 йилнинг ноябрь ойида у ижарага квартира олиб чиқиб кетган эди. Шу орада “бува, турмушга чиқдим” деганди, жаҳл билан қаттиқ гапирдим. “Никоҳимиз бор, мен ҳам қачонгача шундай юраман, эрим номаъқул чиққан бўлса, бу яхши бола экан”, деди. Барибир яхши иш қилмабсан, деб дакки бердим. Ҳомиладор эди. Майли энди, кўнгли ўксимасин, дедим. Эплайсан, чаққонсан, соғ-саломат туғиб олгин, ўзингга ёрдамчи бўлиб қолар экан, деб кўнглини кўтариб қўйдим. Орада келиб-кетиб юрди. Менга кўп гапирмасди, бор дардини сингилларига айтарди. Мен бу муаммолардан энди хабар топдим. Билганимда, уни бу йўлдан қайтаришга, сақлаб қолишга ҳаракат қилардим. Қизим жуда босиқ эди, ўзини ўзи эпларди, бировга муҳтож эмасди, ёрдам сўрамасди, қийналган тақдирда ҳам, ўзи ҳаракат қиларди. Ҳам чеварлик қиларди, ҳам бозорга чиқиб, у-бу нарса сотарди. Қизимни ўқитаман, шифокор қиламан, деб юрарди. Баҳорга чиқиб, уй сотиб олмоқчи эди. Ниятлари кўп эди. Ўша куни соат тўртларда чиқиб кетган экан. Билганимда қўйиб юбормасдим, — дейди марҳуманинг онаси.

Тез тиббий ёрдам бўлими ходимлари томонидан автомашина салонида бўлган марҳума М.Х.нинг ёнғин натижасида туғилган ўғил жинсли чақалоғи ҳаёти сақлаб қолинган. Аммо бола узоқ яшамаган.

24 январь куни соат 19:20 ларда диспетчеримиз чақирув берди. “Нефтьчи” стадионининг ёнида ёнғин бўлаётганини айтди. У ерга тезкорлик билан етиб бордик. Борганимизда ўт ўчирувчилар ёнғинни ўчиришаётган экан. Машина ичидан тутун чиқяпти, улар эшикни очишга ҳаракат қиляпти. Атрофдагилар машина ичида ҳомиладор аёл бор дейишди. Машина эшигини очишганидан кейин эътибор берсак, аёл ёниб, куйиб кетган ҳолатда машина ичида ётган экан. Чақалоқ бор, тирик экан дейишди. Чақалоқни ёрдамчим кўтариб олди. Мен қайчи билан уни онасидан ажратиб, киндигини кесдим. Иссиқ матога ўраб, тезкорлик билан яқин атрофдаги туғуруқхонага олиб бордик, — дейди Фарғона шаҳар тез тиббий ёрдам маркази шифокори Иқбол Абдуллаев.

Фарғона шаҳар тиббиёт бирлашмаси туғуруқхона бўлими шифокори Саида Муслимованинг айтишича, шифокорлар томонидан кўрсатилган зарур тиббий ёрдамга қарамасдан, чақалоқ шифохонада вафот этган.

24 январь куни тунги навбатчилик пайтимда Фарғона шаҳар туғуруқ комплексига тез тиббий ёрдам машинасида чақалоқ олиб келинди. Чақалоқ янги туғилган, оғир аҳволда эди. Дастлабки текширувда юз фоиз куйган тан жароҳатлари оқибатида бемор критик ҳолатда эканлиги аниқланди. Чақалоқ дарҳол реанимация бўлимига олиниб, унга юқори малакали тиббий ёрдам кўрсатилди. Афсуски, чақалоқ 3 соат-у 5 дақиқа яшади. Муддатидан олдин туғилгани ва юз фоиз куйиш жароҳати билан олиб келингани учун ҳаётини сақлаб қолишнинг имкони бўлмади. Иш фаолиятимиз давомида бундай ҳодисага биринчи марта дуч келдик. Ўзимиз ҳам таажжубландик, ҳайратда қолдик. Жудаям аянчли ҳолат эди, — дейди Саида Муслимова.

Мазкур ҳолат юзасидан Фарғона шаҳар прокуратураси томонидан Жиноят кодексининг 103-моддаси 2-қисми “б” банди (ўзини ўзи ўлдириш даражасига етказиш) билан жиноят иши қўзғатилиб, дастлабки тергов ҳаракатлари олиб борилмоқда.