“Қирғизистонда 100 гектар интенсив боғ ва иссиқхоналар ташкил қилиш бўйича келишувларни амалга оширдик” — Ўзбекистон қишлоқ хўжалиги вазири
Ўзбекистон президенти Шавкат Мирзиёевнинг Қирғизистонга ташрифи арафасида “Қирғизистон – Ўзбекистон” бизнес-форуми бўлиб ўтди. Forum доирасида Ўзбекистон Қишлоқ хўжалиги вазири Азиз Воитов интервью берди.
Воитовнинг сўзларига кўра, вазир қишлоқ хўжалиги йўналишида қирғизистонлик ҳамкасби билан ҳужжат имзолаган.
“Бу ҳужжат кенг тармоқли йўналишларни ўз ичига олган йўл харитаси бўлиб, бунда, асосан, биз ҳамкорликда қиладиган чорвачилик, мева-сабзавотчилик ва бошқа шу каби йўналишлардаги лойиҳалар киритилди. Хабарингиз бор, икки давлат раҳбарларининг ўзаро дўстона алоқалари доирасида вазирликларга ҳам ҳамкорликларни кенг йўлга қўйиш бўйича топшириқ, йўналиш бериляпти. Икки давлат тадбиркорлари кўп лойиҳаларни биргаликда амалга оширяпти”, — дейди Қишлоқ хўжалиги вазири.
Азиз Воитовнинг айтишича, икки мамлакат халқида биргаликда ишлаш, ҳамкорликда лойиҳаларни амалга оширишга жуда катта хоҳиш бор.
“Бизнинг икки вазирлик ҳам ўз йўналишларимиз бўйича кенг қамровли йўналишларни келишиб олдик. Айтишим керакки, жуда очиқ, самимий, икки томонлама манфаатли учрашувлар бўлиб, ҳамма йўналишларни қамраб олди. Жумладан, чорвачилик йўналишида биз Қирғизистондаги ерлардан унумли фойдаланган ҳолда, қирғиз дўстларимиз билан ҳамкорликда чорвачилик комплекслари, майда шохли, йирик шохли қорамолларни боқиш, етиштириш ҳамда қайта ишлаш бўйича агрокомплекслар ташкил қилишни йўлга қўймоқчимиз. Ўзбекистонда давлатимиз раҳбари ташаббуслари билан мева-сабзавот соҳаси анча ривожланган.
Энди биз қўшниларимизга бу тажрибани улашиб, бу ерда бошланишига 100 гектар интенсив боғ, иссиқхоналар ташкил қилиш бўйича келишувларни амалга оширдик. Мева-сабзавот маҳсулотларини қайта ишлаш бўйича ҳам биргаликда учинчи давлатларга экспорт қилиш бўйича ҳам келишувларни амалга оширдик. Ҳозирги йўл харитаси хусусий тадбиркорларимизнинг тахминан 500 млн долларлик лойиҳаларини ўз ичига олган комплекс чора-тадбирлардир”, — дейди Ўзбекистон қишлоқ хўжалиги вазири.
