Ғарб ҳарбий амалдорлари Украинага қирувчи самолётлар етказиб бериш масаласини муҳокама қилмоқда, деб хабар берди Politico газетаси манбаларга таяниб. Муҳокама Болтиқбўйи мамлакатлари кўмагида Киев ташаббуси билан бошланган.
Politico нашрига кўра, қирувчиларни етказиб бериш бўйича муҳокама танклар атрофидаги муҳокамадан кўра мураккаброқ бўлади. Европалик дипломатларнинг нашрга айтишича, ҳозир Европа мамлакатларининг Киевга қирувчи самолётлар бериш ҳақидаги фикри ижобий томонга ўзгарган. Шу билан бирга, Украина иттифоқчилари орасида бу ҳаракат можаронинг янада кучайишига олиб келиши мумкинлигидан қўрқув сақланиб қолмоқда.
“Кейинги табиий қадам қирувчи самолётлар бўлади”, — деди Politico манбаларидан бири. Нашрнинг яна бир манбаси ҳозир қирувчиларни етказиб беришни “мутлақо ақлга сиғдириб бўлмайдиган” деб айтди, бироқ икки-уч ҳафта ичида бу муҳокамага яна қайтиш мумкинлигини қўшимча қилди.
Politico нашрининг ёзишича, Оқ уй Киевга ҳозирда қирувчи самолётларни топшириш имконсиз эканини билдирган. Нашр таъкидлаганидек, илгари АҚШ ҳукумати HIMARS ёппасига ўт очувчи реактив тизимлари ва жанговар танкларни етказиб беришдан ҳам бош тортганди, аммо охир-оқибат бу қуроллар Украинага берилди.
25 январь куни Германия ва АҚШ Украинага Леопард 2 ва Abrams оғир танкларини етказиб беришини расман эълон қилди, бошқа давлатлар ҳам оғир қуроллар етказиб бериш режаларини эълон қилди. Шундан сўнг Украина президенти Владимир Зеленский Украина Қуролли кучларига самолётлар, артиллерия ва узоқ масофали ракеталар ҳам зарурлигини айтди.
Нидерландия ва Словакия қирувчи самолётларни етказиб беришга тайёрлигини билдирган. Ўз навбатида, The Telegraph нашрининг ёзишича, Буюк Британия Мудофаа вазирлиги қирувчиларнинг ўтказилиши Россия—Украина урушининг янада кучайишига олиб келишидан хавотирда.
Изоҳ (0)