Афғонистонда аномал совуқ туфайли камида 157 киши ҳалок бўлди. Бу ҳақда CNN мамлакатда ҳокимият тепасида турган “Толибон” вакилига таяниб хабар бермоқда.
Афғонистонда ҳаво ҳароратининг пасайишидан ўлганлар сони бир ҳафта ичида икки бараварга кўпайди, деб таъкидламоқда CNN.
Аввалроқ Бирлашган Миллатлар Ташкилотининг Гуманитар масалаларни мувофиқлаштириш бошқармаси афғон аҳолисига 565 минг кишига мўлжалланган кўрпа-тўшак, иситиш мосламалари ва бошпана воситалари кўринишидаги ёрдам тарқата бошлаганини маълум қилганди.
Афғонистон сўнгги йиллардаги энг совуқ қишлардан бирини бошдан кечирмоқда, январь ойи бошида ҳарорат Цельсий бўйича минус 28 даражагача тушиб кетди. Иқлимнинг салбий таъсири гуманитар инқироз туфайли кучаймоқда. БМТ маълумотларига кўра, 30 миллионга яқин одам — мамлакат аҳолисининг учдан икки қисми яшаб қолиш учун зарур ёрдамга муҳтож.
Шу фонда январь ойининг ўрталаридан бошлаб Ўзбекистондан электр энергияси етказиб бериш тўхтатилганди. Бироқ ўтган икки кунда “Толибон” вакиллари ҳам, Ўзбекистон расмийлари ҳам Афғонистонга энергия етказиб бериш тез орада тикланишини маълум қилди.
Туркманистон, Тожикистон ва Эрон ҳам Афғонистонга электр энергиясини етказиб берувчи асосий давлатлардир.
Изоҳ (0)