Круассан тайёрлашнинг фақат французларга маълум бўлган сирлари 

Французларнинг ошпазлик сирларидан фойдаланиб, уйда мазали круассанларни тайёрлаш мумкин. Marie Claire нашри тақдим этган тавсияларга амал қилиш орқали пишириқлар юмшоқ ва мазали бўлиб чиқиши шубҳасиз.

Maxсус хамир тайёрлаш технологияси

Маълумки, турли хил пишириқлар — пирог, печене ёки круассан ҳам индивидуал ёндашувни талаб қилади. Ушбу ун маҳсулотларининг ҳар бири учун хамир махсус рецепт бўйича тайёрланади. Шу нуқтаи назардан, ҳар бир кишининг севимли ширинлиги — круассанлар қандолатчиликнинг энг инжиқ турларидан биридир. Уларни тайёрлаш энг кўп вақт талаб қиладиган ширинлик бўлиб қолмоқда.

Круассан хамири қандай тайёрланади? Бунинг учун 350 грамм оғирликдаги сариёғ бўлаги ун билан сепилган озиқ-овқат плёнкасига ўралади ва музлаткичга қўйилади. Шу билан бирга, 40 грамм хамиртуруш 200 мл сутда суюлтирилади. Алоҳида 500 грамм эланган ун, 2 грамм қабартма, 30 грамм шакар упаси, 30 грамм ўсимлик ёғи ва бир чимдим туз аралаштирилади. Кейин ҳосил бўлган масса аралаштирилади ва хамир қорилади.

Хамирни бир неча босқичда совитиш

Хамирни ёйиш жуда кўп сабр-тоқат талаб қилади. Плёнкага ўралган 12×20 см ўлчамдаги хамирлар қатлами музлаткичда 30 дақиқа туриши керак. Кейин уни унли юзага қўйиб, ярмига сариёғ қўйилади, иккинчи ярми билан ёпилади. Натижада 1 сантиметр қалинликдаги тўртбурчак хамир ҳосил бўлиши керак. У визуал равишда учта бир хил кўндаланг қисмга бўлиниб, учта қатламга букланади. Қатлам яна плёнка билан ўралади ва аввал музлаткичга 15 дақиқа, кейин эса совиткичга 15 дақиқага қўйилади. Французлар бу жараённи камида 5 марта такрорлайди. Сўнгра хамир перпендикуляр равишда кесилади.

Тўғри ёғ танлаш муҳим

Круассанларни мазали, юмшоқ ва қат-қат қилиш учун бир нечта нозик нарсаларни ҳисобга олиш керак. Француз қандолатчилари қуйидагиларни тавсия қилади: сариёғнинг таркибида миқдори 82 фоиз ёки ундан кўп ёғ бўлганини танлаш керак. Ун ва сариёғ тенг нисбатда олинади. Энг муҳими, круассан хамирини аста-секин ёйиш тавсия этилади, акс ҳолда кўп миқдорда кислород унга зарар етказиши мумкин. Идеал ҳарорат 15-16 даражадир. Бироқ круассанларни тайёрлаш учун 25-26 даража ҳарорат талаб қилинади.

Начинкани ихтиёрий тарзда танлаш мумкин

Французлар круассанларни начинкасиз тайёрлайди, аммо бу юмшоққина пишириқлар ичига бирор нарса қўшишга тўсқинлик қилмайди. Шоколадли круассанлар айниқса машҳур. Уларни тайёрлаш учун қалинлиги 3-5 миллиметр, асоси 10 сантиметр бўлган хамирни тенг бурчакли учбурчаклар шаклида кесиш керак. Қора шоколад майдаланиб, хамирнинг бир қисмига қўйилади. Круассанлар рулет каби ўралиб, ярим ой шаклида қайрилади. Қолган хамирлар ҳам худди шу тарзда ҳосил қилинади. Юқорида айтиб ўтилганидек, круассанлар ярим соатга қолдирилади. Кейин уларни пергамент қоғози устига териб чиқилади, тухум сариғи ва сут аралашмаси билан ёғланади. 200 даражада олдиндан қиздирилган печда тахминан 20-25 дақиқа давомида пиширилади.

Вақт ва куч бўлмаса

Агар шошаётган бўлсангиз ёки юқоридаги жараённи амалга оширишни истамасангиз, тайёр круассан хамирини танланг. Тайёр хамир қўшимча иш талаб қилмайди, вақт ва кучни тежайди. Мазали ҳамда юмшоқ круассанлар оила даврасида ёки дўстлар билан учрашувларнинг энг муҳим қисми ҳисобланади.

Мавзуга доир:

• 30 дақиқада тайёр бўладиган мазали печене рецепти
• Атиги 4 та маҳсулотдан тайёрланадиган ва печда пиширилмайдиган шоколадли чизкейк рецепти
• Ҳамёнбоп ва мазали: қаймоқ қўшиб тайёрланадиган пирог рецепти