Хитой билан урушда АҚШнинг снарядлари бир ҳафта ичида тугайди — WSJ
АҚШ ҳарбий саноати Хитойга қарши узоқ давом этадиган кенг кўламли эҳтимолий урушга тайёр эмас. Бунга Россиянинг Украинага бостириб кириши тажрибасидан далолат беради, деб ёзади The Wall Street Journal.
Нашрда келтирилишича, Украинадаги чўзилган уруш АҚШдаги мавжуд қурол-яроғ захираларининг кескин қисқаришининг “стратегик хавфи” мавжудлигини кўрсатди. WSJ Вашингтонда жойлашган Стратегик ва халқаро тадқиқотлар маркази катта вице-президенти Сет Жонс томонидан чоп этилган тадқиқотга таянмоқда.
Таҳлилчи нашрга берган интервьюсида ҳозирги пайтда АҚШ ҳарбий саноати тинчлик режимида ишлаётганини айтди. Юқори мартабали Америка ҳарбий ва мансабдор шахсларининг сўзларига кўра, Хитой билан уруш юз берган тақдирда, АҚШ армиясининг ўқ захираси тезда тугайди.
“Ҳинд-Тинч океанидаги Хитой билан юзага келиши мумкин бўлган можаро Украинада кечаётган асосан қуруқликдаги урушдан фарқ қилади, аммо АҚШ барибир йирик миқдорда қурол ишлатиши керак бўлади. Саноат базаси билан боғлиқ муаммо, ҳарбий шартнома тузишнинг эскирган тартиби ва суст бюрократия туфайли АҚШ узоқ давом этадиган можарода бардош бериши қийин”, — дейди у.
Бу муаммонинг яққол кўрсаткичи сифатида Жонс Украинага Javelin танкка қарши тизимлари етказиб берилишини келтирмоқда. У 2022 йил август ойидан бери Украина Қуролли кучлари Америка саноати 7 йил ичида ишлаб чиқарадиган миқдордаги танкка қарши тизимларни олган.
Кўчиб юрувчи зенит-ракета тизимлари сўнгги 20 йил ичида АҚШ экспорт таъминотига тенг бўлган миқдорда Украинага етказиб берилди. Украинага бир миллиондан ортиқ 155 мм калибрли снарядлар бериш орқали АҚШнинг ўзида бу ўқ-дорилар қисқарди
“Гаубицалар ва артиллерияга қарши радарлар билан боғлиқ вазият ҳам худди шундай”, — дейди таҳлилчи.
У агар зарурат туғилса, Америкага қурол ишлаб чиқаришни кенгайтириш учун икки йил керак бўлишини прогноз қилди. Айни пайтда, ҳисоб-китоблар шуни кўрсатадики, Хитой билан уруш бўлса, АҚШнинг бир ҳафтадан камроқ вақт ичида узоқ масофали бошқариладиган ўқ-дорилари тугайди. Жонс АҚШ ҳукуматига ўзининг умумий ўқ-дориларга бўлган талабларини кўриб чиқишни ва стратегик захира яратишни тавсия қилмоқда.
Мавзуга доир: Учинчи жаҳон уруши 2023 йилда бошланиши мумкин бўлган 5 та жой
