Ўзбекистонда ҳокимларнинг айрим мажбурият ва ваколати бекор қилинмоқда
Ўзбекистонда маҳаллий давлат ҳокимияти органлари ва ҳокимлар айрим ваколатлардан маҳрум бўлмоқда, деб хабар берди Норма.
Маълум қилинишича, “Ўзбекистон Республикасининг айрим қонун ҳужжатларига ўзгартиш ва қўшимчалар киритиш тўғрисида”ги қонун президент томонидан имзоланди.
Киритилаётган ўзгаришлар маҳаллий давлат ҳокимияти органлари, ҳокимлар, божхона органлари, Иқтисодиёт ва молия вазирлиги ваколатларига ҳамда МЧЖни мажбурий аудитдан ўтказиш талабига оид.
Маҳаллий давлат ҳокимияти органларининг қуйидаги ваколатлари бекор қилинмоқда;
- тиббий ёрдам сифатининг клиник-статистик стандартларига риоя этилишини назорат қилиш;
- ёдланган туз ва ёдланган озиқ-овқат маҳсулотларининг сифати ҳамда хавфсизлиги, уларни сақлаш шароитлари устидан давлат назоратини амалга оширади.
Ҳокимлар уй-жой мулкдорлари ва уй-жойдан фойдаланувчиларидан коммунал хизматлар тўлови ва мажбурий бадалларни тўлаш бўйича қарзларни ундириш тўғрисида даъволар билан судга мурожаат қилиш ваколатидан маҳрум бўлмоқда.
Шунингдек, активларининг баланс қиймати БҲМнинг 100 минг баравари миқдоридан кўп бўлган МЧЖлар учун ҳар йилги ташқи аудиторлик текширувидан ўтиш мажбурияти бекор қилинмоқда
Эндиликда чет давлатларда рўйхатдан ўтказилган ва Ўзбекистон ҳудудида вақтинча фойдаланилаётган транспорт воситаларининг эгалари томонидан мажбурий суғурта бўйича мажбуриятларнинг бажарилиши устидан назоратни божхона органлари амалга оширмайди. Ушбу ваколат давлат ёъл ҳаракати хавфсизлиги хизматида сақланиб қолмоқда.
Вазирлар Маҳкамаси, Молия ва иқтисодиёт вазирлигининг аудиторлик фаолиятини тартибга солиш бўйича айрим ваколатлари нодавлат нотижорат ташкилотлари –аудиторларнинг республика жамоат бирлашмаларига ўтказилмоқда. Хусусан, аудиторлар бирлашмаларига:
- аудиторлар малакасини оширишнинг намунавий дастурини тасдиқлаш;
- малака имтиҳонини ўтказиш тартибини белгилаш (Молия ва иқтисодиёт вазирлиги билан келишган ҳолда);
- номзодни малака имтиҳони топширишга қўйиш ёки рад этиш;
- сертификатни расмийлаштириш ва қайта расмийлаштириш, сертификат ва уни дубликатини бериш ваколатлари ўтказилмоқда.
Ушбу ҳужжат 21 январдан бошлаб кучга кирган.
