Энергетика вазирлиги Ўзбекистондан Афғонистонга электр энергиясини етказиб бериш қайта тикланиши режалаштирилаётганини эълон қилди.
2023 йилнинг 14 январидан Ўзбекистонда ҳаво ҳароратининг кескин пасайиши оқибатида иссиқлик электр станцияларида ёқилғи таъминотида вужудга келган муаммолар, яъни ёғилғи танқислиги ва турли носозликлар пайдо бўлгани, шунингдек, республика истеъмолчиларини барқарор электр энергияси билан таъминлаш мақсадида Афғонистонга электр энергиясини етказиб бериш вақтинчалик тўхтатилган эди.
Ушбу форс-мажор ҳолати ҳақида Афғонистон энергетика ташкилоти огоҳлантирилган. Эндиликда 25 январдан бошлаб ушбу мамалакатга электр энергиясини етказиб бериш қайта тикланиши режалаштирилмоқда.
«Ўзбекистонда ишлаб чиқарилган ва ички истеъмолга мўлжалланган электр энергияси экспортга йўналтирмайди. Ҳукуматлараро келишувга мувофиқ амалга ошириладиган электр энергияси импорт амалиётининг бир қисми Афғонистонга (имзоланган шартномаларга мувофиқ) экспорт қилинади», — дея тушунтириш берган Энергетика вазирлиги.
Афғонистоннинг Кобул шаҳри ва вилоятларида электр энергияси тақчиллиги давом этаётгани сабабли «Толибон» Ўзбекистонга мурожаат қилиб, Ўзбекистондан шартнома асосида электр энергияси экспорт қилишни сўраганди. «Толибон» ташқи ишлар вазири вазифасини бажарувчи Амирхон Мутаққий Кобулдаги Афғонистон қишлоқ хўжалигини ривожлантириш жамғармаси очилишида Ўзбекистон ҳукумати Афғонистон электр энергияси компанияси билан имзоланган шартномага мувофиқ ўз ваъдаларини бажаришига умид билдирганди.
Изоҳ (1)
Мархамат килиб аввал уз ахолисини электр билан таъминлаб куйсин 8 соатдан бери электрсиз утирибмиз утган хафта хатто 1 сутка булмади . Кишлок жойда эмас андижон шахрининг кок маркази 4- микрорайонда