«Тоттенҳэм» АПЛда 14 йиллик антирекордни қайд этди

«Тоттенҳэм» Премер Лиганинг қолдирилган 7-тури доирасида «Манчестер Сити»га қарши баҳс олиб борди.

Биринчи бўлимда иккита гол уришга эришган «шпорлар» танаффусдан кейин ўз дарвозасидан тўртта тўп олиб чиқиб, мағлубиятга учради (2:4).

«Тоттенҳэм» АПЛда 2009 йилнинг апрелидан кейин илк бор биринчи бўлимдан сўнг икки ва ундан ортиқ тўп фарқи билан олдинда бориб якунда ютқазиб қўйди. 14 йил аввал Лондон клуби шундай ҳолатда «Манчестер Юнайтед»га мағлуб бўлганди.

«Тоттенҳэм» Премер Лига жорий мавсумида топ-6 лик жамоаларига («Манчестер Юнайтед», «Манчестер Сити», «Челси», «Арсенал», «Ливерпуль») қарши ўйинларда 18 имкониятдан бор-йўғи 1 очко тўплай олди.

Антонио Конте жамоаси ягона очкони «Челси»га қарши баҳсда (2:2) қўлга киритган. Қолган бешта ўйин бой берилган: «Арсенал»га иккита ўйинда ҳам ютқазди (0:2 ва 1:3), шунингдек, «Манчестер Юнайтед» (0:2), «Ливерпуль» (1:2) ва «Манчестер Сити» (2:4) тўсиғидан ўтолмади.

Лондон жамоаси 33 очко билан 5-поғонада бормоқда.

Аввалроқ «Тоттенҳэм» 2022/23 йилги мавсум охирида Антонио Конте билан хайрлашиш ниятида экани хабар қилинганди.