Ўзбекистон 2022 йилда Хитойга қувур орқали 1 млрд доллардан кўпроқ газ етказиб берди

Ўзбекистон 2022 йилда Хитойга қувур орқали 1,07 млрд долларлик газ етказиб берди. Бу ҳақда Хитой Бош божхона бошқармаси маълумотларига таяниб, «ТАСС» хабар бермоқда. 

Бошқарманинг онлайн тизимида 2022 йилда кўрсатилган энергия ташувчиси импортининг физик ҳажми, аввалги йиллардагидан фарқли ўлароқ, кўрсатилмаган.

Департамент маълумотларига кўра, Хитойга газ қувури сотувчи давлатлар орасида Туркманистон биринчи ўринни эгаллаб турибди: 12 ой давомида бу мамлакатдан Хитойга етказиб берилган ҳажми 10,25 миллиард долларни (51 фоизга ўсиш) ташкил этди. 

Кейинги ўринларда Россия (1,51 млрд доллар), Мьянма (1,43 млрд доллар), Қозоғистон (1,08 млрд доллар) ва Ўзбекистон ( 1,07 млрд доллар).

2022 йилда Ўзбекистондан Хитойга газ етказиб бериш ҳажми 2021 йилга нисбатан 34 фоизга ошган. 

Дарё мухбири ушбу мавзу юзасидан газ экспорти учун масъул бўлган «Ўзтрансгаз» АЖ ахборот хизмати билан боғланди. Бироқ мазкур ахборотни тасдиқловчи ёки инкор этувчи маълумотни олишнинг имкони бўлмади.

«Ўзбекистонда статистика билан шуғулланувчи махсус давлат органи бор. Биз бошқа мамлакатнинг эмас, Ўзбекистоннинг расмий маълумотига таянишингизни сўраймиз», — деди ташкилот матбуот котиби Толиб Раҳматов.

Аввалроқ Ўзбекистонга Туркманистондан газ етказиб беришдаги муаммолар Хитойга жиддий таъсир қилиши мумкинлиги ҳақида хабар берилган эди.