Saudi Aramco 2023 йилда нефтга бўлган талаб барқарор равишда ошиб боришини кутмоқда
2023 йилда Хитойда пандемия чекловларининг юмшаши ва ҳаво саёҳатлари бозорининг тикланиши туфайли нефтга талаб ортади. Бу ҳақда Saudi Aramco нефть компанияси бош директори Амин Носирга таяниб, Bloomberg хабар берди.
«Биз нефть бозоридаги талаб истиқболларига жуда оптимистик қараймиз, бу ҳам Хитойдан келаётган ижобий сигналлар билан боғлиқ», — деди у Bloomberg агентлигига берган интервьюсида.
Авиация ёнилғисига бўлган талаб бир йил ичида икки баравар ошди, аммо Saudi Aramco раҳбарининг сўзларига кўра, у ҳали пандемиягача бўлган даражага етмаган.
Носир нефть саноатига инвестицияларни кўпайтиришга чақирди. «Захиралар қисқармоқда ва таъминотнинг ҳар қандай узилиши жиддий оқибатларга олиб келиши мумкин», — дея огоҳлантирди у.
Саудия компанияси бош директорининг фикрича, нефтга бўлган талабнинг ўсиши яқин ўн йилликда барқарор бўлади.
Носирнинг таъкидлашича, электр транспорт воситаларининг оммабоплиги ва қайта тикланадиган энергетиканинг ривожланиши уни қисман қоплайди, аммо 2030 йилга келиб хом нефть истеъмоли ошади.
Аввалроқ Саудия Арабистони Осиё ва Европа учун нефть нархини пасайтириши ҳақида хабар берилган эди.
