Ўзбекистон ва Бруней ўртасида тўғридан-тўғри авиақатновлар ташкил этилади
16 январь куни Ўзбекистоннинг Куала-Лумпурдаги элчихонаси кўмагида Ўзбекистон ва Бруней транспорт вазирликлари ҳамда Uzbekistan Airports АЖ, Marokanda Air ва Royal Brunei Airlines авиакомпаниялари раҳбарлари ўртасида онлайн учрашув бўлиб ўтди, деб хабар бермоқда «Дунё» ахборот агентлиги.
Қайд этилишича, 1974 йилда ташкил этилган Royal Brunei Airlines Бруней султонлигининг давлатга қарашли миллий авиакомпанияси ҳисобланади. Бугунги кунда компания Жануби-Шарқий Осиё, Яқин Шарқ, Европа, Австралия ва Океаниянинг 20 йўналиши бўйлаб мунтазам парвозларни амалга оширмоқда.
Музокаралар чоғида Uzbekistan Airports АЖ фаолияти, хорижий авиакомпанияларга бошқа давлатлардан йўловчи ва юк қатновларини ташкил этишда мавжуд имтиёз ва преференциялар, шунингдек, Самарқанд халқаро аэропортида жорий этилган «Очиқ осмон» режими ҳақида батафсил маълумотлар тақдим этилган.
Ҳамкорликни йўлга қўйиш масалалари, хусусан, Royal Brunei Airlines авиакомпаниясининг Ўзбекистонга тўғридан-тўғри ҳаво қатновларини амалга ошириш истиқболлари муҳокама қилинган.
Royal Brunei Airlines авиакомпанияси вице-президенти Иляс Рори Тео мамлакат аэропортларини модернизация қилиш, сайёҳлар учун қулай шарт-шароитлар яратиш бўйича республикада кўрилаётган чора-тадбирларни юқори баҳолаб, ўзбекистонлик ҳамкорлар билан алоқаларни йўлга қўйишдан манфаатдор эканини таъкидлаган.
Биринчи қадам сифатида Ўзбекистон ва Малайзия ҳукуматлари ўртасида ҳаво қатнови тўғрисидаги битимни ишлаб чиқиш ва имзолаш орқали ҳамкорликнинг ҳуқуқий асосларини яратиш таклиф этилган. Икки давлат бозорларини ўзаро ўрганиш мақсадида республика авиакомпаниялари билан код-шер ёки интерлайн келишув асосида ўзаро ҳамкорлик қилиш имконияти қайд этилган.
Бруней Транспорт ва ахборот коммуникациялари вазирлигининг Авиацияни ривожлантириш департаменти бошлиғи Лайлатул Зурайда ҳам икки давлат авиация маъмурияти ва аэропортларининг салоҳиятини мустаҳкамлаш, шунингдек, зиёрат туризми, хусусан «Умра +» дастури доирасида ҳамкорликни йўлга қўйишни таклиф қилган.
Учрашув якунлари бўйича ҳамкорлик истиқболларини батафсил муҳокама қилиш, аэропортлар ҳамда сайёҳлик объектлари инфратузилмаси билан танишиш учун Бруней Транспорт ва инфокоммуникация вазирлиги ҳамда Royal Brunei Airlines авиакомпанияси вакилларининг Ўзбекистонга сафарини ташкил этиш бўйича келишувга эришилган.
