Банкрот бўлган FTX криптобиржаси хакерларни 415 млн доллар ўғирлашда айблади

2022 йилнинг ноябрида банкрот бўлган криптобиржа — FTX хакерлик ҳужуми чоғида унинг ҳисоб рақамларидан 415 миллион доллар олиб қўйилгани ҳақида хабар берди. Бу ҳақда криптобиржа сайтидаги кредиторларга йўлланган хабарда айтилади.

Хабарда айтилишича, халқаро «FTX.com» сайтидан 323 миллион доллар, компаниянинг Америка бўлинмаси ҳисобларидан яна 90 миллион доллар ўғирланган, Alameda Research фондидан эса 2 миллион доллар олиб қўйилган. 

Компаниянинг таъкидлашича, мазкур киберҳужум ўтган йилнинг ноябрида биржа қулаганидан кўп ўтмай содир бўлган.

FTX Group 11 ноябрь куни банкротлик тўғрисида ариза берганди. Эртаси куни Багама ороллари ҳукумати банкрот криптовалютанинг 3,5 миллиард долларлик рақамли активларини уларнинг хавфсизлиги учун мусодара қилган. 

FTX асосчиси Сем Банкмен-Фрид Қўшма Штатларда бўлиб, у ерда инвестор фирибгарлик ишининг бир қисми сифатида экстрадиция қилинган. 

У 13 декабрь куни Багама оролларида АҚШ талабига биноан криптовалюта инвесторларини алдашда айбланиб ҳибсга олинган. FTX адвокатлари мижозларга товон тўлаш учун 5 миллиард доллар тўплади.

Аввалроқ хакерлар 2022 йилда 3,5 миллиард долларлик криптовалюталарни ўғирлагани ҳақида хабар берилганди.