Жорий йилнинг ноябрь ойида Ўзбекистондаги банклараро тўлов операциялари ва Товар-хом ашё биржасидаги фаоллик таҳлил қилинди. Бу ҳақда «Дарё»га Иқтисодий тадқиқотлар ва ислоҳотлар маркази хабар бермоқда.

2022 йил ноябрь ойида банклараро тўлов операциялари сони 6,12 миллионтани ташкил этди ва 2022 йилнинг октябрь ойига нисбатан 411,4 минг транзакцияга (7,2 фоиз) ошди. Банклараро тўлов операциялари сони 11 та ҳудудда ошган.

Ноябрда мамлакатнинг 11 та ҳудудида юридик шахслар ўртасидаги банк операциялари сони ўтган ойга нисбатан ошган.

Сезиларли даражадаги ўсиш Андижон (27,7 фоиз), Самарқанд (10,8 фоиз), Фарғона (6,7 фоиз) вилоятлари ва Тошкент шаҳрида (8 фоиз) кузатилган.

Шу билан бирга Жиззах (-5,7 фоиз), Сирдарё (-4 фоиз) ва Қашқадарё (-1,7 фоиз) вилоятларида камайиш кузатилган.

Товар-хом ашё биржасидаги фаоллик

2022 йилнинг ноябрь ойида Ишбилармонлик фаоллиги индексининг биржа компоненти 1,0584 бирликни ташкил этди.

Бу эса ушбу компонентнинг ўтган ойга нисбатан 5,8 фоизга ошганлигини англатиб, ҳар бир битим бўйича сотиб олинган товарлар ўртача ҳажмининг 11,5 фоизга ва битимлар сонининг 0,1 фоизга ошганлиги билан изоҳланади.

Товар-хом ашё биржасида товарлар савдоси умумий айланмаси ҳажми 2022 йил ноябрь ойида 6,35 трлн сўмни ташкил этиб, ушбу кўрсаткич ўтган ойга нисбатан 1,3 фоизга камайган.

Аввалроқ Ўзбекистоннинг қайси ҳудудларида ишбилармонлик фаоллиги ўсгани маълум қилингани ҳақида хабар берилганди.