Ўзбекистонда ҳафта ўрталарида қор ёғиши кутилмоқда

Ҳафта ўртасида республика бўйича ёмғир кўринишидаги ёғингарчилик бўлади, ёмғир қорга айланади, деб хабар бермоқда «Ўзгидромет».

Қайд этилишича, 19 декабрь, душанба куни Ўзбекистон бўйича ёғингарчилик кутилмайди. Ҳаво ҳарорати 7-10 даража илиқ атрофида бўлади.

20 декабрь, сешанба куни республиканинг катта қисмида 7-10 даража илиқ бўлган ҳарорат билан қуруқ ва нисбатан илиқ об-ҳаво сақланиб туради. Фақат шимолий ҳудудларга Кавказ ҳудудларидан совуқ антициклон кириб келиши бошланади. Фронт кириб келишида Қорақалпоғистон бўйича бироз қор ёғиши кутилмоқда. Баъзи жойларда шамол 15-20 метр/секундгача кучаяди. Ҳаво ҳарорати 0-3 даража илиққача пасаяди.

21 декабрда совуқ антициклон кириб келиши республиканинг барча ҳудудларига тарқалади. Ўзбекистон бўйича баъзи жойларда ёмғир ва қор кўринишида бироз ёғингарчилик бўлади. Баъзи жойларда шамол 15-20 метр/секундгача кучаяди. Ҳаво ҳарорати кечаси 3 даража совуқ — 2 даража илиқ, кундузи 3-8 даража илиқ атрофида бўлади. Республика шимолида кечаси ҳарорат 9-11 даража совуққача кучаяди, кундуз куни 0-3 даража совуққача пасаяди.

22—23 декабрь кунлари Ўзбекистон бўйича ёғингарчилик кутилмайди, фақат 22 декабрда Фарғона водийси вилоятларида баъзи жойларда бироз қор ёғади. Ҳарорат кечалари 2-5 даража совуққача, кундуз кунлари 2-5 даража илиққача пасаяди.

Республика бўйича кечаси ва эрталаб туман тушиши кутилмоқда.

21—22 декабрь кунлари йўлларда яхмалак кузатилади.