Буюк Британия бош вазири Риши Сунак 2023 йилда Украинага юз минглаб артиллерия ўқ-дориларини тақдим этиш режалари ҳақида эълон қилади, бу ҳақда ҳукумат раҳбари канцелярияси баёнот берди. Ёрдам 250 миллион фунт стерлинг (304 миллион доллар)лик шартнома доирасида тақдим этилади. 2022 йилда Лондон Украинага 100 мингта ўқ-дори юборган.
Сунак Шимолий Европа ва Болтиқ мамлакатлари, шунингдек, Нидерлания етакчилари билан учрашув чоғида баёнот билан чиқади. У ушбу давлатлар етакчиларини 2023 йилда Украинани қўллаб-қувватлашда давом этишга ёки кўмак ҳажмини оширишга даъват этмоқчи.
Тадбир Ригада бўлиб ўтади, унда онлайн форматда Украина президенти Владимир Зеленский ҳам қатнашади. Шундан кейин Сунак Эстонияга жўнаб кетиб, у ерда НАТОнинг кўпмиллатли батальони таркибида хизмат ўтаётган британиялик ҳарбийлар билан учрашади.
BBC маълумотларига кўра, Риши Сунак аввалроқ Киевга ҳарбий кўмак Россия билан қуролли низога қандай таъсир кўрсатишини баҳолашни сўраган. Телеканал даъво қилишича, юқори мансабли амалдорлар бош вазир «ўта эҳтиёткор ёндашувни танлагани»дан хавфсирамоқда.
Аввалроқ Сунак Буюк Британия 2023 йилда Украинага ҳарбий ёрдамни оширишини ваъда қилганди. «Шубҳа қилманг. Биз Украинани қанча вақт керак бўлса, шунча қўллаб-қувватлаймиз. Келгуси йилда ҳарбий ёрдамни сақлаб қоламиз ёки оширамиз. Шунингдек, Украина халқи ва муҳим инфратузилмасини ҳимоя қилиш учун ҳаво мудофаасини қўллаб-қувватлаймиз», — деган эди у.
Изоҳ (0)