Осиё тараққиёт банки (ОТБ) глобал прогнознинг ёмонлашуви фонида ривожланаётган Осиё ва Тинч океани минтақаси учун иқтисодий ўсиш прогнозларини пасайтирди. Бу ҳақда «Дарё»га банк ҳисоботидан маълум бўлди.
Минтақа иқтисодиёти жорий йилда 4,2 фоизга, келаси йилда эса 4,6 фоизга ўсади, — дейилади ОТБ баёнотида.
ОТБ сентябрь ойида иқтисодиёт 2022 йилда 4,3 фоизга, 2023 йилда эса 4,9 фоизга ўсишини прогноз қилган эди.
Марказий банклар томонидан глобал ва минтақа пул-кредит сиёсатининг кескинлашуви, Украинадаги урушнинг узоқ давом этиши ва Хитойнинг такрорий локдаунлари Осиёнинг COVID-19 пандемиясидан тикланиш жараёнини секинлаштирмоқда.
Коронавирусга нисбатан «нол бардошлилик» ёндашуви остидаги чекловлар, мулк бозоридаги мураккаб вазият билан бир қаторда, Хитойнинг иқтисодий ўсиш прогнозининг яна бир бор пасайишига олиб келди.
Осиё ва Тинч океани минтақаси тикланишда давом этади. Бироқ глобал шароитнинг ёмонлашуви янги йил арафасида жадаллик бироз пасаяётганини англатади, — деди ОТБ бош иқтисодчиси Алберт Парк.
ОТБ жорий йилда ривожланаётган Осиё ва Тинч океани минтақасидаги инфляция прогнозини 4,5 фоиздан 4,4 фоизгача пасайтирди.
Бироқ банк энергия ва озиқ-овқат маҳсулотларининг узоқ давом этаётган инфляция босими туфайли келгуси йил учун прогнозини 4 фоиздан 4,2 фоизгача оширди.
Хитой иқтисодиёти бу йил олдинги 3,3 фоизлик прогнозга нисбатан 3 фоизга ўсиши прогноз қилинмоқда. Глобал иқтисодий секинлашув туфайли келгуси йил учун прогноз 4,5 фоиздан 4,3 фоизгача қисқартирилди.
Ҳиндистон учун ялпи ички маҳсулотнинг ўсиши прогнозлари жорий йилда 7 фоиз ва кейинги молиявий йилда 7,2 фоиз даражасида сақланиб қолди.
Ривожланаётган Осиё прогнозлари пасайтирилган бўлса ҳам, кўрсаткичлар ўсиш ва инфляция бўйича глобал миқёсдаги бошқа минтақаларга қараганда яхширолигича қолди.
Малайзия, Филиппин, Таиланд ва Ветнамда кучли истеъмол ва туризм тикланиши шароитида ОТБнинг Жануби—Шарқий Осиё учун бу йилги ўсиш прогнози 5,1 фоиздан 5,5 фоизга кўтарилди.
Келгуси йил учун прогнозлар глобал талабнинг заифлашиши туфайли 5 фоиздан 4,7 фоизгача туширилди.
Бу йил Кавказ ва Марказий Осиё учун ўсиш прогнози 3,9 фоиздан 4,8 фоизга, Тинч океани минтақаси бўйича прогноз эса Фижида туризмнинг кучли тикланиши туфайли 4,7 фоиздан 5,3 фоизга кўтарилди.
Аввалроқ халқаро агентлик Ўзбекистон иқтисодий ўсиш прогнозларини яхшилагани ҳақида хабар берилганди.
Изоҳ (0)