Парижда 70 дан ортиқ давлат ва ташкилотлар иштирокида «Украина халқи билан бирдамлик» номли конференцияси бўлиб ўтди. Конференция якунида Франция президенти Эммануэль Макрон Киев учун 1 миллиард евродан ортиқ ёрдам йиғишга муваффақ бўлганини маълум қилди.
«Париждаги конференцияда биз Украинага ёрдам учун 1 миллиард евродан кўпроқ маблағ тўпладик, пуллар унга апрелгача юборилади», — деб ёзди Франция президенти Twitter’да.
Reuters агентлиги Франция ташқи ишлар вазири Катрин Колоннага таяниб, ушбу маблағнинг 415 миллион еврога яқини Украина энергетика секторини тиклашга йўналтирилишини ёзди. Маблағлар шунингдек, украиналикларни сув, қишлоқ хўжалиги маҳсулотлари, соғлиқни сақлаш ва транспорт билан таъминлашга ҳам сарфланади.
Франция 2022 йилда жами ҳисобда Украинага инсонпарварлик ёрдами сифатида 200 миллион евро юборди ва яқин кунларда Париж Киевга энергия таъминотини тиклаш учун яна 76,5 миллион евро ажратади, дея қўшимча қилган Макрон.
У Россия томонидан бошланган уруш Украина, Европа ва Бирлашган Миллатлар Ташкилоти (БМТ) келишувида белгиланган халқаро норма учун ҳаётий хавф туғдираётганини таъкидлаган.
Париждаги конференцияда Украина президенти Владимир Зеленский ҳам онлайн нутқ сўзлаган ва Украинага энергетика объектларини тиклаш учун камида 1,5 млрд евро кераклигини айтган.
Изоҳ (0)