Германияда давлат тўнтаришини уюштирмоқчи бўлган гуруҳ мамлакат канцлери Олаф Шольцга суиқасд қилишни режалаштирган. Бу ҳақда терговдан хабардор манбаларга таяниб, The New York Times хабар берди.
Полиция давлат тўнтариши уюштиришни режалаштирган гуруҳнинг уйини тинтув қилганда, юздан ортиқ «маълумотни ошкор қилмаслик» тўғрисидаги келишувларни топган.
«Унга имзо чекканлар гуруҳнинг Германия парламентига ҳужум қилиш ва унинг аъзоларини ҳибсга олиш, шунингдек, канцлерга суиқасдни ўз ичига олган режани сир сақлашга қасамёд қилган», дейилади хабарда.
Таъкидланишича, гуруҳ аъзоларидан кимдир бу маълумотларни очиқласа, ўлимга ҳукм қилиниши керак бўлган.
Нашрнинг аниқлик киритишича, «Рейхсбюргер» террорчилик тармоғининг раҳбари деб ҳисобланган, давлат тўнтариши муваффақиятли амалга оширилган тақдирда Германияни бошқаришни режалаштирган шаҳзода Генрих XIII Германиядаги Бош консулликда камида бир марта россиялик дипломатлар билан учрашган.
Тинтув давомида полиция 40 га яқин ўқотар қурол ва мингдан ортиқ ўқ-дориларни топган, бу эса ҳали топилмаган ўқ-дорилар омборлари мавжудлигидан далолат беради.
7 декабрь куни Германия Бош прокуратураси матбуот хизмати давлат тўнтаришига тайёргарлик кўраётган 25 киши, жумладан, Россия фуқаролари ҳибсга олингани ҳақида хабар берди.
Гумонланувчилар 2021 йилда тузилган террорчилик ташкилоти аъзоси ва тарафдорлари бўлиб, уларнинг мақсади «Германиядаги мавжуд сиёсий тизимни ағдариш» бўлгани айтилган.
Бош прокуратуранинг қайд этишича, гумонланувчилардан бири Германиядаги Россия вакиллари билан алоқа ўрнатишга уринган. Россиялик аёл террорчи гуруҳ аъзоларига Россия вакиллари билан боғланишда ёрдам берганликда гумон қилинмоқда. Шу билан бирга, терговда Россия томони фитначиларни қўллаб-қувватлагани ҳақида ҳеч қандай далил йўқ.
Мавзуга доир:
Изоҳ (0)